Төрийн соёрхолт Б.Лхагвасүрэнгийн зохиол “Тамгагүй төр” жүжгийг энэ сарын 25-наас эхлэн УДЭТ-ын тайзнаа ирэх зургадугаар сарын 5-ныг хүртэл тоглоно. Энэхүү бүтээл нь монголчуудын язгуурын төрт ёс, төрийн уламжлал, түүхэн бахархлыг харуулсан бөгөөд Монголын болон дэлхийн олон орны тайзнаа 222 дахь удаагаа амжилттай тоглогдоод байна.
“Тамгагүй төр” буюу “The Mongol Khan” жүжиг нь 200 гаруй уран бүтээлчдийн хамтын хүчээр бүтсэн бөгөөд тэдний дунд жүжигчид, бүжигчид, дуучид, уран нугараачид зэрэг олон төрлийн уран бүтээлчид багтжээ. Энэхүү түүхэн жүжиг нь Монголын болон олон улсын үзэгчдэд хүрч, эх орондоо 117 удаа, Сингапурын “Марина Бэй Сэндс” цогцолборт 22 удаа, Лондон хотын “Колизей” театрт 17 удаа тоглогдож, нийт 40,000 гаруй үзэгчдэд хүрчээ.
Тэгвэл эл уран бүтээлийг ирэх аравдугаар сард Япон Улсад тоглохоор болсон баайна. Тодруулбал, аравдугаар сарын 10-20-нд Токио хотод, аравдугаар сарын 24-26-нд Нагояа хотод тоглох аж.
“Тамгагүй төр жүжгийн” зохион байгуулагчдын зүгээс тус жүжгийг улсын төсвөөс 350 сая.ам доллароор санхүүжсэн гэх яриа гарсан талаар мөн тайлбар өгчээ. Уг тайлбарт “Энд тийм зүйл байхгүй, цэвэр хувийн хэвшлийн хөрөнгөөр бүтээгдсэн бөгөөд ямар нэгэн улсын санхүүжилтгүйгээр үйл ажиллагаагаа явуулж байгаа” гэх тайлбар мэдээлэл өгсөн байна.
