Поп од, дуучин Жастин Биберийн эхнэр, загвар өмсөгч Хэйли Бибер өөрийн нүүр будаг, гоо сайхан, арьс арчилгааны “Rhode” брэндээ “e.l.f. Beauty” компанид нэг тэрбум ам.доллароор худалдахаар болсон байна.
28 настай загвар өмсөгч Хэйли Бибер “Rhode” брэндээ 2022 онд нөхрийн хамт үүсгэн байгуулж байсан бөгөөд брэндээ өөрийн дунд нэрээр нэрлэсэн аж.
Түүний брэндийн нэр хүнд “TikTok” гэх мэт аппликейшнүүдийн ачаар цахим орчинд өсөж, 2024 оны гуравдугаар сараас хойшхи нэг жилийн хугацаанд нийт орлогын хэмжээ нь 200 сая ам.долларыг даваад зогсохгүй АНУ болон Их Британи дахь “Sephora” сүлжээ дэлгүүрүүдээр бараа бүтээгдэхүүнээ борлуулахаар төлөвлөөд байсан байна.
Тэгвэл түүний брэндийг худалдан авах тохиролцоонд хүрсэн талаар “e.l.f. Beauty” компанийн зүгээс мэдэгдэж, 800 сая ам.долларыг бэлнээр болон компанийн хувьцаа хэлбэрээр төлөх бол 200 сая ам.долларыг нь компанийн ирээдүйн орлогоос төлөх нөхцөлтэйгээр тохиролцсон байна.
Хэйли Бибер мөн өөрөө “Rhode” компанийн ахлах бүтээлч даргын албан тушаалд үлдэх бөгөөд энэхүү тохиролцоо нь брэндийн дараагийн шинэ үе шат болж байгаа гэдгийг өөрийн нийгмийн сүлжээний хуудсандаа онцолжээ.
Талууд “Rhode” брэндийг худалдан авах гэрээг оны сүүлчээр эцэслэн байгуулахаар болсон байна.
