Улсын хүүхэлдэйн театрын уран бүтээлчид Бурхан багшийн их дүйчин өдөрт зориулж “Мял Богдын намтар” хүүхдийн жүжгээ тоглолоо.
Өнөөдөр Бурхан багшийн их дүйчин өдөр тохиож буй бөгөөд бурхан багшийн лагшин мэндэлж, төгс гэгээрлийн хутгийг олж, нирваан дүрийг үзүүлсэн гурван үйл зохиол давхацсанаараа бусад дүйчин өдрөөс онцлогтой юм.
“Мял Богдын намтар” жүжигт Богд Мялрайвагийн талаар өгүүлдэг бөгөөд тэрбээр 1052 онд Түвдэд баян айлын Тойвгоо нэрт ууган хөвүүн болж мэндэлсэн ч долоон настайдаа эцгээ алдаж, ээж, дүү хоёрын хамт авга ах дээрээ гуйлгачны амьдралаар өсжээ. Эцгийн үлдээсэн өв хөрөнгийг өвлөх нас нь болоход шуналын хүүдий болсон авга нар нь “Чаддаг юм бол хараал хийж ав” гэснээр Түвдийн алдарт хараалчийн шавиар орж, хараал сурсан байдаг. Жил орчим хараалын эрдэмд шамдаж, нутагтаа ирээд өс хонзонгоо тайлж буй жүжгийн хэсэгт хөгжим, гэрлийн хурц шийдлийг шашны зан үйлтэй нэгтгэн шигтгэж өгсөн нь хараалын шидээс эрхгүй айх мэдрэмжийг үзэгчдэд төрүүлдэг ажээ.
