Увс аймаг байгуулагдсаны 100 жилийн ойн баяр наадам 7-р сарын 29, 30-ны өдрүүдэд болно. Түүхт 100 жилийн ойдоо зориулж, Увс аймгийн Өндөрхангай сумын уугуул Монгол түмний сэтгэлд хоногшсон олон зуун дууны эзэн БНМАУ-ын Ардын жүжигчин, Гавьяат жүжигчин, дуучин Гомбын Түмэндэмбэрэлийн гэрэлт хөшөөг уугуул нутаг Увс аймгийн зон олны санаачилгаар бүтээжээ.
Хөшөөг Увс аймгийн “Ойрад” хөгжимт жүжгийн театрын өмнөх талбайд байрлуулах бөгөөд хөшөөний нээлт долдугаар сарын 27-ны ням гарагийн 09.00 цагт эхэлнэ.
Гэрэлт хөшөөг Хөдөлмөрийн баатар, Гавьяат тамирчин, үндэсний бөхийн Даяар дуурсагдах далай даян дархан аварга Жигжидийн Мөнхбатын хөшөөг бүтээсэн уран барималч Ж.Түмэнчулуун тэргүүтэй уран бүтээлчид урлажээ.
