Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Тажикистан Улсад хийж буй төрийн айлчлалын хүрээнд зохион байгуулсан “Монголын соёлын өдрүүд” арга хэмжээ 2025 оны долдугаар сарын 24-ний өдөр тус улсын нийслэл Душанбе хотноо амжилттай болж өндөрлөлөө.
Арга хэмжээний хүрээнд Үндэсний урлагийн их театрын уран бүтээлчид “Монголын сайхан орон” бүрэн хэмжээний тоглолтоо Тажикистан Улсын Сараддин Айны нэрэмжит Улсын дуурь бүжгийн эрдмийн театрын тайзнаа толилуулав. Мөн морин хуурын үзэсгэлэн болон гэрэл зургийн үзэсгэлэнг хүрэлцэн ирсэн зочид, төлөөлөгчдөд дэлгэн сонирхууллаа.
Тоглолтыг Соёл, спорт, аялал жуулчлал, залуучуудын сайд Ч.Ундрам нээж үг хэлэхдээ “Монголчуудын сэтгэлгээ, амьдралын хэв маяг, домог түүхтэй салшгүй холбоотой амьд хөгжим хэмээн эрт дээр үеэс монгол гэрийн хойморт залран дээдлэгдэж ирсэн бидний үнэт өв морин хуурын хөг аялгуу нь Монголын төдийгүй дэлхийн олон тайзнаа эгшиглэж, соёлын элч болон түгэн дэлгэрч байна” хэмээн цохон тэмдэглээд, тус тоглолтыг зохион байгуулахад дэмжлэг үзүүлсэн Тажикистан Улсын Соёлын яам болон Тажикистаны ард түмэнд гүн талархал илэрхийлэв.
