Увс аймаг байгуулагдсаны түүхт 100 жилийн ойг тохиолдуулан Монгол Улсын Ерөнхийлөгч Монгол Улсын Гавьяат жүжигчин, “Хамаг монгол төсөл”-ийг санаачлагч Самандын Жавхланд Монгол Улсын Ардын жүжигчин цол хүртээлээ.
С.Жавхлангийн хувьд 2003-2015 онд Чөлөөт уран бүтээлчээр Монгол орныхоо бүх аймаг, хотуудаар зургаан удаа тойрч, аялан тоглолт хийж байсан. Мөн Монгол туургатан Өвөр Монгол, Шиньжян Уйгурын өөртөө засах орнууд, Бүгд Найрамдах Буриад Улс, Бүгд Найрамдах Тува Улс, Бүгд Найрамдах Халимаг Улсуудад удаа дараа уригдан, уран бүтээлийн тоглолтоо хүргэж, монгол өв соёлоо сурталчилсан. Ард олны зүрх сэтгэлд хоногшсон 200 гаруй хит дуу, 13 цомог, 15 удаагийн бие даасан тоглолтоос гадна дэлхийн 30 оронд уран бүтээлийн тоглолтоо хийжээ. Түүнчлэн “Хамаг Монгол” төслийн хүрээнд Буриад, Өвөр Монгол, Халимаг, Тува уран бүтээлчидтэй хамтран томоохон уран бүтээлүүдийг хийсэн нь түүний уран бүтээлийн томоохон төслүүдийн нэг юм.
Дуучин С.Жавхлан 2009 онд Монгол Улсын Гавьяат жүжигчин, 2023 онд Буриад Улсын Гавьяат жүжигчин, 2024 онд Халимаг Улсын гавьяат жүжигчин цолоор тус тус шагнуулж байжээ.
