Хибла Герзмавагийн нэрэмжит дуурийн дуучид болон төгөлдөр хуурчдын хоёрдугаар уралдааны шагналтнуудын гала тоглолт есдүгээр сарын 19-нд болно. Эл тоглолтын гол уран бүтээлчид нь дуурийн дуучин Э.Анхбаяр болон Казахстаны Абай нэрэмжит Улсын дуурь, бүжгийн академик театрын гоцлол дуучин Дамир Садуахасов, ОХУ-ын Большой театрын тайзнаа уригдан дуулж байсан Армен Улсын дуурь, бүжгийн эрдмийн театрын гоцлол дуучин Элен Егиазарян тэргүүтэй шилдгүүд байх юм.
Гавьяат жүжигчин, дуурийн дуучин Э.Анхбаяр нь УДБЭТ-ын тайзнаас үзэгчидтэй үндэсний бахархалт бүтээл Б.Дамдинсүрэнгийн “Учиртай гурван толгой” дуурийн Юндэн, Б.Шаравын “Чингис хаан” дуурийн Боорчи, мөн Ж.Вердийн “Травиата” дуурийн Жермон, Ж.Пуччинийн “Богема” дуурийн Марчелло, П.И.Чайковскийн “Евгений Онегин” дуурийн Онегин, Ж.Бизегийн “Кармен” дуурийн Эскамильо, Данкайро, В.А.Моцартын “Дон Жуан” дуурийн Дон Жуан, П.И.Чайковскийн “Гилбэрийн хатан” дуурийн Елецкий зэрэг дэлхийн сонгодог дууриудын дүрүүдээр уулзаж байв.
Үүнээс гадна ОХУ-ын Улан-Үдэ, Японы Токио, Нагоя, Австрийн Вена, Зальцбург хотод, Голланд, Белги, Грек, Италийн алдарт Ла Скала театрын их тайзнаа мөн ОХУ-ын Большой театрын тайзнаа өөрийн бие даасан болон хамтарсан тоглолтонд оролцож байсан юм.
Э.Анхбаяр Отто Эдельманы нэрэмжит уралдаан, Елена Образцовагийн нэрэмжит уралдаан, П.И.Чайковскийн олон улсын уралдаанд эх орноо төлөөлөн амжилттай оролцож, Кардифф хотод болсон ВВС-ийн “Дэлхийн шилдэг дуучин” уралдааны хагас шигшээд шалгарч, олон улсын Хибла Герзмава дуучид, концертмейстерүүдийн уралдааны тусгай шагнал хүртэж байв. Мөн тэрбээр Римский Корсаковын нэрэмжит уралдаанд оролцож, романс, дуурийн төрөлд зэрэг түрүүлсэн анхны дуучин юм.
