Ойд умбах буюу япон хэлээр шинрин-ёкү хэмээх дадал нь бясалгалын нэг төрөл бөгөөд байгальд өөрийгөө бүрэн умбуулж, мэдрэхүйн бүх эрхтнээрээ холбогдохыг зорьдог арга юм. Хэдэн арван жилийн өмнө үүссэн энэхүү арга нь байгальд цагийг өнгөрөөж, стрессийг бууруулж, төвлөрлийг сайжруулдаг гэх судалгаанд үндэслэдэг.
Сүүлийн үед уг дадал нийгмийн сүлжээгээр хурдацтай түгж, ой, ногоон байгууламжид аялж буй хүмүүс өөрийн сэтгэгдлээ хуваалцаж байна. TikTok-д #forestbathing гэсэн хаштагтай 45 мянга гаруй бичлэг нийтлэгдэж, оролцогчид сэтгэцийн эрүүл мэндэд эерэг өөрчлөлт мэдэрснээ хэлжээ.
“Энэ бол тайвширч, байгальтай бүх мэдрэхүйгээрээ холбогдох, тухайн мөчид орших тухай юм” хэмээн АНУ-ын Умард Каролина мужид анхны баталгаат ойд умбах замыг байгуулсан, “Pinnacle Forest Therapy”-гийн үүсгэн байгуулагч, ой эмчилгээний хөтөч Марк Эллисон онцолж байна.
Эллисон удирддаг аялал ихэвчлэн 90 минут үргэлжилж, чимээгүй ажиглалт, бясалгалд төвлөрдөг. Зарим оролцогчид уйлж, хайртай хүнээ дурсах эсвэл уй гашуугаа даван туулах зорилгоор энэ туршлагыг сонгодог байна. Түүний хэлснээр ойд умбах нь анхаарал төвлөрөл, сэтгэл санааг сэргээдэг.
Эллисон хүмүүсийг гар утсаа унтрааж, зураг авах эсвэл сошиал хаяг шалгахгүй байхыг зөвлөдөг. Байгальтай бүрэн холбогдох нь чухал аж. Мөн энэ дадлыг ой, ууланд заавал хийх шаардлагагүй бөгөөд өөрийн хашаа, орон нутгийн цэцэрлэгт ч хийх боломжтой аж. 15 минут ч болов модны дэргэд суух нь ашиг тустайд тооцогддог байна.
