Нас сүүдэр 50 гарсан энэ австрали эр амжилтад хүрэхээсээ өмнө хонь маллаж, хөгжим зохиож, шөнийн клубт ди жей хийж, мөрийтэй тоглоомын газарт ажиллаж…
Ер нь хийж болох бүх л ажлыг хийж явжээ. Харин одоо бол тэр “Оскар”-ын шагнал хүртчихсэн, дэлхийн шилдэг жүжигчдийн нэг гэдгээ хүлээн зөвшөөрүүлсэн нэгэн.
Тэрбээр дэлхийд усан галав юүлэх үед амьдралыг аврахаар бурхнаас сонгогдсон Ной гэгч эрийн тухай домгоос сэдэвлэсэн “Ной” бүрэн хэмжээний уран сайхны киног хамгийн сүүлд бүтээгээд байгаа юм.
Кино АНУ-д энэ сарын 26-нд нээлтээ хийх юм. Хойд хөршийн “7 хоног” сэтгүүлийн сэтгүүлч түүнтэй уулзаж, сонирхолтой ярилцлага өрнүүлжээ. Тэд “Ной” киноны зураг авалтын талбай дээр уулзсан байна.
-Сайн уу, Рассел. Жүжигчин хүнтэй зураг авалтынх нь талбайд уулзах болсондоо таатай байна. Хоёр минутын өмнө би таныг гантель өргөж байхыг харлаа. Одоо шөнө дунд болж байна, та дандаа ийм орой бэлтгэл хийдэг хүн үү?
-Тийм ээ, тийм. Сайндаа ч биш, дулаацахын тулд л ингэж байгаа юм. Манай кино усан галавын тухай. Байнга нойтон хувцастай байх хэцүү, даарна. Өнөөдөр гэхэд л дандаа усанд норж байгаа 6-7 план авлаа. Өдөрт 20 цаг ажиллаж байгаа ч хийх зүйл зөндөө байна.
-Зураг авалтыг би ердөө 30 минут л ажиглалаа. Гэхдээ та бүхэн дэлхийн татах хүч, агаарын даралтын эсрэг орчин үеийн технологитой сонин техник хэрэглээд байх шиг ээ?
-Бид яг наад асуудалд чинь их нухацтай хандаж байгаа. Ямар ч хийлдэг тоглоом, усан буу ашиглаагүй. Тропикийн бүсийн жинхэнэ ширүүн бороог бий болгож чадахуйц, усаар дүүргэсэн цистернүүд бидэнд байна. Бидний одоо зогсч байгаа газар бол Исландын галт уулын гадарга юм шүү дээ. Бид энд ирхээс өмнө Исландад зураг авалт хийж байсан. Тэндэхийн галт уулсын бүсэд байдаг байгалийн зүй тогтолтой нийлэхээрээ энэ үнэхээр гайхамшиг болж хувирна. Одоо дээшээ хар даа. Газтай том том бөмбөлөг байгаа биз. Тэд тас харанхуй шөнө ч зураг авалтын талбайг өдөр шиг болгох чадалтай.
-Кинонд библид өгүүлдэг Нойгийн түүх гардаг. Ийм чухал дүрд тоглоно гэхдээ эргэлзэж, айгаагүй юу?
-Эргэлзээ бол мэдээж байсан. Библид Ной 950 жил амьдарсан гэж өгүүлдэг. Суугаад бодсон, “Хм, 950 жил… урт кино болох нь дээ” гэж. Дараа нь зохиолоо уншлаа. Эцэст нь киног Даррен Аронофски найруулах болсныг сонсоод шийдвэрээ гаргасан. Нэгд, би түүний кинонуудад дуртай /энэ найруулагч “Реквием”, “Хар хун” зэрэг кино найруулсан/. Дараа нь тэр “Энэ кино үнэхээр дэлхийн бүх хүмүүст юм бодогдуулна, ямар шашинтай байхаас нь хамаарахгүй” гэж амласан юм. Тэр “Тайвшир даа, Рассел анд минь. Би чамайг нэг завин дээр хоёр анааштай аваачаад хаячихгүй. Бас улавч өмсч, өвдөгцөө нөмрөг хөдрөх хэрэг гарахгүй” гэж амласан юм. Тэгээд хэлсэндээ хүрсэн. Та харж байгаа биз дээ, завь гэхэд зургаан давхар шиг болсон. Модоор ч хийгээгүй, модны өнгөтэй пластик ашигласан. Үнэн гоё болсон байгаа биз дээ. Орж ч болно.
-Сахал чинь их ургажээ?
-Мэдээж сахалгүй байж яаж болох билээ. Дунд сургуулийн сурагч бүр л Ной сахалтай байсныг мэддэг шүү дээ. Өмссөн хувцас ч гэсэн давгүй зохиж байгаа биз дээ.
-Амьтдаа яаж аргалсан бэ. Жинхэнэ амьтад тоглуулсан уу?
-Мэдээж. Тэд тээр тэнд, дотор байгаа. Тэдэнтэй болгоомжтой байгаарай, тэгэхгүй бол миний араатнууд сэтгүүлчдээр хооллох дуртай шүү /инээв/. Тоглосон юм аа. Кинонд гарах бүх амьтдыг компьютер график ашиглаж хийсэн.
Х.Сайхан
