Төгөлдөр хуурч Б.Оюу өөрийн бие даасан гурав дахь тоглолт болох “Ф.Шопений үдэш” тоглолтоо ирэх сарын 4-нд Улсын филармонид эгшиглүүлэхээр болжээ.
Тэрбээр саяхан болсон Шопений олон улсын хоёрдугаар уралдаанд эх орноо төлөөлөн оролцож тусгай байр эзлэн элэг нэгтнүүдээ баярлуулсан чадварлаг төгөлдөр хуурч билээ. Түүний энэ удаагийн тоглолтыг хөгжмийн зохиолч С.Саянцэцэг тайлбарлах аж. Тэрээр тоглолтонд тоглож буй бүтээлүүдийг ямар онцлогтой хөгжмийн бүтээл болох төгөлдөр хуурчаас ямар ур чадвар шаардаж байгаа зэргийг маш сонирхолтойгоор тайлбар хийх гэнэ.
Энэ талаар төгөлдөр хуурч Б.Оюугаас тодруулахад “Хүмүүс сонгодог хөгжмийн тоглолтыг үзлээ ч ямар ойлгох биш дандаа л гунигийн аянууд тоглодог гэсэн ойлголттой байдаг. Миний тоглолт тийм биш. Би бүх зохиолыг хамгийн сайнаар мэдэрч үзэгчдэд хүргэхийг хичээнэ. Миний багш С.Саянцэцэг тоглолтыг маань хөтөлж, бүх зохиолуудын тайлбарыг нь мэргэжлийн өндөр түвшинд тайлбарлаж өгнө. Тиймээс та бүхэн миний тоглолтонд ирсэнээр өөр хаанаас ч олж сонсож байгаагүй яриа, тайлбарыг сонсож, сонгодог хөгжмийн сайхныг бие сэтгэлээрээ мэдрэх боломжтой” гэв.
