Улсын дуурь, бүжгийн эрдмийн театрын хамт олон нийгмийн хариуцлагынхаа хүрээнд тусгай хэрэгцээт уран бүтээлч хүүхдүүдийг дэмжих зорилгоор БНСУ-ын “Ж-Арт” хамтлагтай хамтарсан “Ирээдүй-Бидний оролцоо-тэнгэр-од-салхи” тоглолтыг театрын тайзнаа 2025 оны есдүгээр сарын 16-ны өдрийн 15.00 цагт зохион байгуулах гэж байна.
БНСУ-ын “Ж-Арт” тусгай хэрэгцээт буюу хөгжлийн бэрхшээлтэй хөгжмийн хүмүүсээс бүрдсэн хамтлаг юм.
БНСУ-ын “Ж-Арт” хамтлагийн зорилго нь хөгжлийн бэрхшээлтэй хүмүүстэй холбоотой асуудалд анхаарал хандуулах, нийгэмд соёлыг түгээн дэлгэрүүлэх үйлсийг дэмжих замаар хөгжлийн бэрхшээлтэй хүмүүсийн нэр төр, эрхийг хамгаалах, түүнийг сурталчлахад хувь нэмэр оруулах явдал юм. Хөгжмийн найруулагч Жан Э-Рёнг нь маримба хөгжимчин бөгөөд 2018 оны Пёнчан өвлийн Олимпийн хаалтын ёслолд Өмнөд Солонгосын төрийн дууллыг анх удаа тоглож байсан түүхтэй. Хөгжмийн найруулагч Жан Э-Рёнг нь “Жарт” Ансамблийн гишүүдийн хөгжмийн ур чадварыг сайжруулахад чиглэсэн, тухайлсан хүнд нь тохируулсан сургалт, дадлага хийдэг. “Ж-Арт” хамталаг нь мэргэжлийн хөгжмийн зохиолчдын бүтээлийг бүтээлчээр цогц байдлаар үзүүлэхээр төлөвлөж, “Projection mapping” зэрэг олон төрлийн уран бүтээлчидтэй хамтран ажиллах ажлыг зохион байгуулж байна.
“Ж-Арт” хамтлаг нь тусгай хэрэгцээт буюу хөгжлийн бэрхшээлтэй хүмүүсийн эрх, түүний олон талт чанар, үйлдлийг олон улсын үйл ажиллагааны хүрээнд дэлхий нийтэд таниулахыг зорьж байна.
Тус хамтарсан тоглолтод УДБЭТ-ын уран бүтээлчид, Монгол Улсын Филармонийн “Баян Монгол” чуулга, СУИС-ийн багш оюутнууд оролцон тоглох юм. Хамтарсан тоглолтод оролцох БНСУ-ын хүүхдүүдийн “J-Art” хөгжмийн хамтлагийг БНСУ-ын хөгжлийн бэрхшээлтэй иргэдийн Соёл, урлагийн төв ивээн тэтгэн ажиллаж байгаа бөгөөд тус тоглолтыг нийслэлийн Боловсролын Газар, Засгийн газрын хэрэгжүүлэгч агентлаг-Хүүхэд, гэр бүлийн хөгжил, хамгааллын ерөнхий газар, Монголын Дауны Холбоо, Дэлхийн миссийн холбоо зэрэг байгууллага дэмжин хамтран ажиллаж байна.
