Хамтлагийнхаа 20 жилийн ойтой золгож буй “Хурд”-ынхан сонин сайхан ихтэй байна. Тэд энэ оны аравдугаар сарын 23-нд Канадад 10 мянган хүний өмнө тоглох гэнэ.
Тодруулбал, Далай ламыг Ванкуверт лекц унших үеэр тэд уран бүтээлээ толилуулах аж.Тэд ойн баяраа тохиолдуулан гаднын орнуудаар аялан тоглож яваа билээ. Вашингтон, Чикаго, ЛосАнжелес, Сан-Франциско, Сиэтл зэрэг АНУ-ын хотуудад энэ сарын эхээр тоглосон бол өнгөрсөн ням гаригаас эхлэн Канадад амьдардаг нутаг нэгтнүүдээ баярлуулж байгаа. Тэднийг Ванкуверт тоглоход нь тус хотын буддын шашны тэргүүн Цэнддок боломж олгосон байна.
Уг хамтлагийн гитарчин, ая зохиогч Д.Отгонбаяр “Цэнддок хамба Далай ламын уулзалтыг зохион байгуулах юм билээ. Ванкувер дэх монголчуудын холбооны тэргүүн Болд хэмээх залуу биднийг түүнтэй холбож өгснөөр ийм урилга авлаа” хэмээсэн. Тэд өнөөдөр Калгар хотод тоглох бол 30-нд Монреаль, 4 сарын 5-нд Торонтод уран бүтээлээ толилуулаад нутгийн зүг жолоо эргүүлнэ.
Дашрамд дуулгахад, “Хурд”-ынхан 4 сарын 28-наас тавдугаар сарын 2 хүртэл үргэлжлэх Азийн рок хөгжмийн наадамд оролцох гэнэ. Шанхай хотод болох “А” зэрэглэлийн уг наадамд Монголоос анх удаа уран бүтээлчид оролцох бөгөөд “Хурд”-ынхан сүүлийнх нь өдөр 40 минут тоглох юм байна.
Мөн тэд удахгүй гаргах цомгийнхоо “Нандин хайр” дууны зургийг Сиэтл хотод авахуулжээ.
Б.Дөлгөөн
