Германы “Helsing” компани ирээдүйн агаарын дайнд хиймэл оюун ухаан хэрхэн голлох байр суурь эзлэхийг илтгэсэн шинэ бүтээлээ танилцууллаа.
“СА-1 Europa” нэртэй уг тулааны дрон нь сүргээрээ хамтран дайтах чадвартайгаас гадна хүний жолоодлоготой сөнөөгч онгоцтой хамтран ажиллагаа явуулах зориулалттай гэнэ.
Германы Мюнхен хотын ойролцоо болсон нээлтийн үеэр компанийн төлөөлөгчид уг дроныг “2027 онд анхны нислэгээ хийх болно” гэж мэдэгдсэн агаад улмаар дөрвөн жилийн дотор зэвсэглэлд албан ёсоор нэвтрүүлэхээр зорьж буй гэлээ.
Уг дрон нь өнөөгийн өндөр өртөгтэй сөнөөгч онгоцыг орлох бус харин үйл ажиллагааг нь дэмжих, олон тоогоор ашиглах боломжтой шийдэл болж байгаагаараа онцлогтой.
Сүүлийн жилүүдэд АНУ, Хятад, Турк зэрэг орнуудын хиймэл оюунд суурилсан дронууд өргөн хэрэглээнд нэвтэрч, байлдааны тактикийг эрс өөрчилж буй. Харин Европын холбоонд цөөн тооны томоохон үйлдвэрлэгчид давамгайлдаг байсан бол “Helsing” шиг гарааны шинэ компаниуд зах зээлд хүч түрэн орж ирж, технологийн өрсөлдөөнийг улам хурц болгож байна.
“СА-1 Europa” нь зөвхөн Германы аюулгүй байдлын чухал хэрэгсэл төдийгүй, Европын орнуудын хамтарсан батлан хамгаалахын стратегид шинэ суурь болж мэднэ хэмээн цэргийн шинжээчид үзэж байгаа юм.
Эх сурвалж: Eagle.mn
