Сонгодог урлагт өнгө нэмэн мэндэлсэн хамгийн отгон театр болох “Их эзэн хааны театр”-ын уран бүтээлчид шинэ бүтээлээ дэлгэхээр зэхжээ. Энэ бол “Бодлын үнэр” модерн балет юм.
Бүжиг дэглээч Д.Дашлхагвын санаачилгаар байгуулсан “Их эзэн хааны театр”-ынхан жил бүр шинэ модерн балетаа үзэгчдийн хүртээл болгож байгаа билээ. Тэд энэ удаа “Бодлын үнэр” модерн балетийг 4 сарын 20-нд Соёлын төв өргөөнд үзэгчдийн хүртээл болгохоор бэлтгэж байна. Уг тоглолт нь хоёр хэсэгтэй бөгөөд эхний хэсэгт дэлхийн алдарт сонгодог бүжгэн жүжгийн хэсгээс толилуулах бол хоёрдугаар хэсэг нь модерн балетаар үргэлжлэх аж.
Мөн энэхүү тоглолтод БНСУ-д уран бүтээлээ тууривдаг балетийн жүжигчин Ц.Цолмонбуд оролцох гэнэ. Тэрбээр хамтран бүжиглэгчээ БНСУ-аас урихаар төлөвлөөд байгаа аж. Энэхүү балетийг БНСУ-ын бүжиг дэглээч Сун Ён Ил дэглэсэн юм байна.
Дашрамд дуулгахад, “Бодлын үнэр” балетийн тайзыг нэлээд өвөрмөц байдлаар засаж байгаа бөгөөд үзэгчид тайзан дээр хэрхэн бороо оруулж, ус урсгаж болдгийг энэхүү тоглолтоос харах боломжтой ажээ.
Соёлын төв өргөөнд 16.00 цагт ганцхан удаа тоглох "Бодлын үнэр” модерн балетын тасалбар 20, 40, 50 мянган төгрөг юм байна.
www.URLAG.mn
