ОХУ-ын Бүгд Найрамдах Халимаг улсын “Ойрадууд” бүжгийн театрын уран бүтээлчид Увс аймагт хүрэлцэн ирлээ.
Тэд Увс аймгийн “Ойрад” Хөгжимт драмын театрын тайзнаа уран бүтээлийн бие даасан тоглолтоо Увс нутгийн зон олонд зориулан энэ сарын 13, 14-нд толилуулсан юм. “Ойрад” Хөгжимт драмын театрын шинэ барьсан байранд хөл тавих зайгүй, пиг дүүрэн үзэгчтэйгээр тоглолтууд өндөрлөжээ.
“Монгол түмний үсэрсэн цус, тасарсан мах болсон Халимаг ахан дүүс маань 5000 км аялан өвөг дээдсийнхээ нутагт хүрэлцэн ирж, үнэт өв соёлынхоо алтан сан хөмрөгөөс дээжлэн Увс нутгийн зон олонд хүргэж байгаа нь талархууштай байна” хэмээн Увс аймгийн “Ойрад” Хөгжимт драмын театрын дарга Б.Лхагвсүрэн тоглолтын төгсгөлд онцолсон юм.
