ОХУ-ын Ардын жүжигчин Надежда Обуховагийн нэрэмжит олон улсын дуурийн дуулаачдын уралдаанд Ч.Бадрал, Б.Монголхүү нар улсаа төлөөлөн амжилттай оролцсон байна. Манай улсаас гадна ОХУ, АНУ, Франц, Англи, Куба, Украйн, Солонгос, Хятад зэрэг орны 217 дуучин энэхүү тэмцээнд өрсөлдсөнөөс хоёрдугаар шатанд 34 дуучин, гуравдугаар шатанд 14 дуучин шалгаран үлджээ.
Тэднээс Ч.Бадрал II байр, Б.Монголхүү тусгай байрыг тус тус хүртсэн байна. Ч.Бадралын хувьд Москвагийн Хөгжмийн академийн дуулаачийн III курст Н.А.Дмитриева, Б.Монголхүү Москвагийн Соёл урлагийн их сургуулийн дуулаачийн V курст Л.О Земнинкогийн удирдлагад суралцдаг ажээ. Дуучин Ч.Бадралын хувьд Хөгжим бүжгийн коллежийн дуулаачийн ангийг Ц.Ерөө багшийн удирдлага дор төгсөөд ЦДБЭЧ-д дуучнаар ажиллаж байгаа бөгөөд одоогоор ОХУ-д суралцаж буй юм.
Харин Б.Монголхүүгийн хувьд СУИС-ийг Г.Хайдав багшийн удирдлага дор төгссөн билээ. Дашрамд дурьдахад, ОХУ-ын Тверь хотод зохион байгуулагдсан Олон улсын дуурийн дуулаачдын уралдааны тэргүүн байрын шагналыг дуучин Ч.Бадрал хүртэж байсан билээ.
