Суут хөгжмийн зохиолч Ж.Вердийн нэрэмжит олон улсын фестиваль Итали улсын Парма хотод зохион байгуулагдлаа.
Энэхүү фестивальд “Чингис хаан” одонт, Монгол Улсын Гавьяат жүжигчин, дуурийн дуучин Г.Ариунбаатар оролцож, “Отелло” дуурийн Яго-гийн дүрийг бүтээж дуулжээ.
Фестивальд дэлхийд алдартай дуучид, удирдаачид оролцсон бөгөөд “Отелло” дуурийн гол дүр Отеллод дэлхийд нэртэй тенорууд дуулснаараа онцгой байлаа. Тухайлбал, Италийн Фабио Сартори, Азербайжаны Юсиф Эйвазов, АНУ-ын Брайан Жагде нарын алдарт дуучид дуулжээ.
Ташрамд дурдахад, Г.Ариунбаатар энэ аравдугаар сарын 25, 26-нд БНХАУ-ын Бээжингийн Үндэсний урлагийн төвд мөн Ж.Вердигийн “Отелло” дуурийн Ягод дуулах аж.
Түүнчлэн тэрбээр ирэх арваннэгдүгээр сард Францын Бордо хотын “Гранд театр”-т П.И.Чайковский “Иоланта” дуурь, Израилийн Тель Авив хотын “Charles Bronfman Auditorium” театрт Ж.Вердийн “Аида” дуурь, арванхоёрдугаар сард ОХУ-ын Москва хотын “Зарядье” театрт П.И.Чайковскийн “Пиковая дама” дуурьт тус тус гоцолно.
