Артхаус киног дэлгэрүүлэх зорилготой “Алтан хальс” холбооноос долоо хоног бүрийн бямба гаригт зохион байгуулдаг “Dreamers’day” (Мөрөөдөгчдийн өдөр) кино өдөрлөгөөр энэ долоо хоногт монголчуудын тухай сонгодог бүтээл толилуулах гэж байна.
Зөвлөлтийн суут кино найруулагч Всеволод Пудоюкины хувьсгалын гурвал (трилоги)-ын сүүлч нь болох “Азийг нөмөрсөн шуурга буюу Чингис хааны удам” кино 1928 онд бүтээгдсэн бөгөөд дуугүй киноны хамгийн хүчтэй бүтээлүүдийн нэг тооцогддог. Бүтээлч эвлүүлэг, мастер найруулга, хүчирхийллээр дүүрэн хүчтэй оргил үе нь кино түүхнээ мартагдашгүй бүтээл болгож чадсан учраас өнөөг хүртэл дэлхийн, тэр дундаа барууны кино сонирхогчдын дээдэлдэг бүтээл хэвээр байна. Уг киноны үйл явдал Монголын улаан хувьсгалын эхэн үе буюу 1920-иод оны үед хамаарах бөгөөд хөрөнгөтөн гадаад худалдаачны эсрэг тэмцсэнээсээ болж хот айлаасаа хөөгдсөн анчин эр Баяр орох орон, оочих аягагүй хэрэн явсаар хувьсгалын үйл хэрэгт орж, партизан болж улмаар удирдагч болно.
Сонирхуулахад, энэхүү бүтээлд мэргэжлийн жүжигчид биш эгэл буриад монголчууд тоглосон байдаг юм. “Азийг нөмөрсөн шуурга буюу Чингис хааны удам” бүтээлийн улс төрийн үзэл санааг үл анзааран, урлагийн бүтээл талаас нь харвал үзэгчид гайхалтай мэдрэмж төрүүлнэ гэдэгт итгэлтэй байна. Киноны энэ бямба гаригт 14.00 цагаас Энхтайван найрамдлын ордонд гарна.
Г.Эрмүүн
