Дэлхийн роботын олимпиад хамгийн анх 2004 онд Сингапур улсад зохион байгуулагдсан түүхтэй. Тэгвэл 20 гаруй жилийн дараа тус олимпиад Сингапур улсад эргэн иржээ.
Өнгөрсөн жилүүдэд Турк, Герман, Канад, Панам зэрэг дэлхийн олон улсад болж байсан роботын олимпиад өчигдөр /2025.11.26/ Сингапурт нээлтээ хийсэн байна.
Тус олимпиадад энэ жил өрсөлдөхөөр 91 улсын 594 багийн 1571 оролцогч бүртгүүлжээ. Олимпиадаар дамжуулан дэлхийн сурагч, оюутан залуусыг өдөр тутмын амьдралдаа шинжлэх ухаан, технологийг шингээх урам зоригийг өгөх зорилготой юм.
Энэ жилийн олимпиадад 8-22 насны хүүхэд залуус зохион бүтээсэн роботоороо өрсөлдөхөөр бүртгүүлсэн байна. Оролцогчид нас насны ангиллаараа сонгосон төрлүүддээ өрсөлдөнө. Лего роботуудыг ашиглаж даалгавар гүйцэтгэх өрсөлдөөн энэ жил “Роботуудын ирээдүй” гэсэн сэдвийн хүрээнд зохион байгуулагдаж байна.
Зохион байгуулагчдын хэлж байгаагаар хүн төрөлхтөний аж амьдралыг сайжруулах, дэлхийн нийтийн өмнө тулгарч байгаа сорилтуудыг шийдвэрлэхэд роботууд хэрхэн тусалж болох арга замыг судлахад энэ жилийн наадмын сэдэв чиглэгджээ.
Сингапур улсын Тогтвортой байдал, хүрээлэн буй орчны яам роботын олимпиадыг зохион байгуулахад голлох үүргийг гүйцэтгэж байна. Тус яамны сайд Грэйс Фү энэ жилийн тэмцээний сэдвргийн хүрээнд илүү ухаалаг ирээдүйг бүтээхэд ухаалаг техникийг нэвтрүүлэхийг оролцогчдоос уриалж байгаа гэжээ. Мөн Сингапур нь роботын судалгаа, хөгжүүлэлт эрчимтэй өсөн дэвшиж байгаа улс гэдгийг онцолсон байна. Нэн ялангуяа эрүүл мэндийн салбарыг роботжуулах төсөлд Сингапурын эрх баригчид ихээхэн анхаарал хандуулж байгаа ажээ.
Дэлхийн роботын олимпиад энэ сарын 26-28-нд үргэлжилнэ.
