Зэвсэглэсэн хоёр этгээд Сан-Паоло хотын “Библиотека Мариу де Андраде” номын сангаас францын зураач Анри Матиссын найм, Бразилын нэрт зураач Кандидо Портинаригийн таван бүтээлийг хулгайлжээ. Албаныхны мэдээлснээр, хулгайчид өнгөсөн ням гарагт номын сангаар үйлчлүүлж байсан өндөр настай хос болон хамгаалагчийг зэвсгээрээ айлгаж, алдартай бүтээлүүдийг авч зугтсан байна.
Даваа гарагт эрх баригчид хулгайчдын ашигласан тээврийн хэрэгслийг олсон тухайгаа мэдэгдэж, хэдэн цагийн дараа сэжигтэн этгээдүүдийн нэгийг баривчилжээ. Энэ хулгай нь Парис дахь Луврын музейд хоёр сарын өмнө болсон үнэт эрдэнийн дээрэмтэй давхцаж, дэлхийн урлагийн салбарыг цочроосон хэрэгтэй дүйцэхүйц үйл явдал боллоо. “Библиотека Мариу де Андраде” номын сангаас хулгайлагдсан Матиссын бүтээлүүд нь Сан-Паологийн Орчин үеийн урлагийн музейтэй хамтран зохион байгуулсан үзэсгэлэнгийн хэсэг байжээ. Хулгайчид “Номоос музей рүү” нэртэй энэхүү үзэсгэлэнг дуусах сүүлийн өдөр нь онилон дээрэмджээ. Тэд Ням гарагийн 10:00 цагт номын сангийн гол хаалгаар орж, тэр хаалгаараа буцаж гаран ойролцоох метроны буудлын зүг явсан аж.
“Библиотека Мариу де Андраде” нь Бразилын хоёр дахь том номын сан бөгөөд хотын төвд байрлах барилга нь нүүр царай таних технологитой, камерын хяналтын системтэй. Сан-Паоло хот ч мөн нэгдсэн хяналтын камерын системтэй. Сан-Паологийн захиргаа анхны сэжигтэнг “хэрэг үйлдэгдэх үеийн хяналтын камерын шинжилгээний үндсэн дээр” баривчилсан гэжээ.
