Өдгөө дуу хоолой, дүр төрх нь үзэгчдэд хэдийнээ эчнээ танил болсон жүжигчин Н.Ялалт СУИС-ийг 1999 онд төгсжээ. Сургуулиа төгссөнөөс хойш тэрбээр 2000-2020 оны хооронд нийт 20 жил МҮОНРТ, ТВ9, UBS, “Монгол HD” телевизүүд, мөн “Юнивишн”, “Скаймедиа” болон бусад iptv-ээр үзэгчдийн хүртээл болсон уран сайхны болон баримтат кино, хүүхэлдэйн кино, баримтат болон шоу нэвтрүүлэг зэрэг 9000 гаруй бүтээлд орчуулгын жүжигчнээр ажилласан байна. Түүнчлэн “Зуны шөнийн зүүд”, “Оюутны охидод өрөө хөлслүүлнэ”, “Шөнө дундын бүжиг”, “Хориотой жүжиг”, “Сэрүүн хасын нууц” зэрэг жүжигт тоглож, 2022 оноос УДЭТ-аар овоглон “Анна Каренина”, “Хаадын хаан: Андгай”, “Тоглоомчид”, “Ромео, Жульетта”, “Би ч гэсэн жаргамаар байна” зэрэг түүхэн болон сонгодог, орчин үеийн жүжгийн дүрүүдээр тайзнаа гарчээ. Харин дэлгэцийн уран бүтээлийн тухайд 1999 онд “Дурласан дурлуулсан хоёр” уран сайхны кинонд анхлан тоглож, түүнээс хойш дотоодын болон олон улсын 60 гаруй уран бүтээлийн гол болон туслах дүрд тоглосон байна. Түүнчлэн 10 гаруй дэлгэцийн уран бүтээлийн ерөнхий найруулагчаар болон найруулагчийн багт багтан ажиллаад буй.
Түүний тоглосон шинэ уран бүтээл ирэх 2026 оны хамгийн эхний өдөр үзэгчдийн хүртээл болох гэж байна. Тодруулбал, жүжигчин Н.Ялалт “Orange” энтертайнментийн ээлжит уран бүтээл “Ирээдүйгээс ирсэн зочид” уран сайхны киноны гол дүрд тоглосон бөгөөд эл киног 2025 оны нэгдүгээр сарын 1-нээс бүх кинотеатруудаар үзэгчдэд хүргэх аж.
