Ай хань минь, сүүн дэр минь
Аялага намуухнаар мөрийг минь гэрэлтүүлэх
Алс цагийн цагаан сүүдэр минь
Эвий миний сүүдэр минь
Энэлэнт цаг хугацаанд ч намайг гээхгүй
Энэ амьдралын ганц түшиг минь
Шармал нарны түмэн тоосыг цуглуулж хүчээ сэлбэсэн болохоороо
Шантрашгүй байдаг чи
Гал гэрлийн илч дотор чинь оршдогтоо
Гандашгүй чи минь
Салхитай өдрийн дарцаг шиг дэрвэж явахад
Сэтгэлээ төвшитгө гэх шиг
Сунаж мөргөсөн
Бод биеийн
Боорчоос ч үнэнч сүүдэр минь
Бодол давж одсон дээдсийн
Билигт сахиусыг агуулсан
Босоо цагаан сүүдэр минь ээ Араншин байлаа ч эвлэж өгөхгүй
Гоёлын дэвүүрт хатгуулж
Амьтан бүхэн гялгар луу мацаж байхад
Аяглангүй замиланг мөхөөгөөгүй
Алтан аргамж сүүдэр минь ээ
Хаврын яргуй дахин дэлгэрдэг шиг, биш
Зуд болсон ч зун болдог шиг, биш
Одсон эгнээ үүрд дурсах худал шиг, биш
Орой эртгүй явах нь үнэн шиг, биш
Учирсан шиг учирч
Хагацсан шиг хагацдаг аа чи
Нар сарыг замбуутивтэй нь
Нажидыг, Хажидтай нь
Төрийг хэргэмтэй нь
Түмнийг төрөлтэй нь
Амь сахигч нь сүүдэр билээ
Амраг цагаан сүүдэр минь ээ
Зууранги халуунаас бусад үед
Чиний хэрэг үгүй гэх
Зугаанд халсан цагт л
Чи их хэрэгтэй болох
Хүнээс илүү ааль
Атгаг бүхнээ чамд нууж
Хэнээ алдсан биднийгээ
Хэзээч орхиогүй сүүдэр минь
Ай хань минь, сүүдэр минь
Аялаг намуухнаар мөрийг минь гэрэлтүүлэх
Алс цагийн цагаан сүүдэр минь
Эвий минь сүүдэр минь
Энэлэнт цаг хугацаанд ч намайг гээхгүй
Энэ амьдралын ганц түшиг минь
www.URLAG.mn
