Японы судалгааны хүрээлэнд амьдрахдаа танин мэдэхүйн гоц чадвараараа алдаршиж байсан эм шимпанзе 49 насандаа өөд болсныг тус хүрээлэнгийн албаныхан өчигдөр мэдээлжээ.
Киотогийн Их сургуулийн хүний зан үйлийн хувьслын гарал үүслийг судлах төв Ай нэртэй энэ амьтан нэгдүгээр сарын 9-ний өдөр хөгшрөлт, эрхтний ажиллагааны дутагдлын улмаас үхсэнийг мэдээлсэн байна.
Баруун Африкт төрсөн Ай нь 1977 онд Японы хүрээлэнд ирж байжээ. Судлаачид түүнийг 18 сартай байхад компьютерын тусгай гар өгч, ой санамжаа сэргээх, суралцах чадварт сургаж эхэлсэн байна.
Ай таван настайдаа “нэгээс зургаа хүртэл тоолж, 300 төрлийн биетийн тоо, өнгө зэргийг нэрлэж чаддаг болсон” талаар судлаач Тэцүро Мацүзава 1985 онд нийтлэгдсэн тайландаа бичиж байжээ. Ай сургалтаас бусад үед чөлөөт цагаараа зураг зурах, будах дуртай байсан гэдэг. Бусад шимпанзе хоол хүнсээр шагнуулж байж ийм зүйл хийдэг байсан бол Ай ганцаараа зөвхөн өөрийн дур сонирхлоор хийдэг байжээ.
Японы хэвлэлүүдийн мэдээлснээр тэр нэг удаа өөр нэг мичний хамт хаалганы түлхүүр ашиглан хүрээлэнгээс оргож байсан гэнэ. 2000 онд тэр өөртэйгөө адилхан танин мэдэхүйн гоц чадвартай Аюмү нэртэй эр зулзага төрүүлж байжээ.
2017 онд судалгааныхаа 40 жилийн ойгоор Киотогийн Их сургууль Ай шимпанзегийн зурсан зургаар чимэглэсэн хүзүүний ороолтыг нэрт мич судлаач Дэйм Жэйн Гудальд бэлэглэж байв.
