Завхан аймгийн Орон нутаг судлах музейн археологийн танхимын гол үзмэрийн нэг нь цорготой шавар сав юм.
Тус музейд 2023 онд 100 гаруй үнэт үзмэр, эд өлгийн зүйлстэй археологийн танхим байгуулсан юм.
Энэ танхим нь Алдархаан сумын Ямаан-Уснаас олдсон нийтийн тооллын өмнөх гуравдугаар зуунаас нийтийн тооллын нэгдүгээр зууны үеийн олдворууд дээр түшиглэн нээсэн байна.
Археологийн танхимын гол үзмэрүүдийн нэг цорготой шавар сав нь Хүннүгийн язгууртны 61-р булшнаас олдсон дурсгал юм. Оршуулгаас олон хагархай хэсэг олдсоныг эвлүүлж, 50 гаруй хувь нь бүтэн болсон байна. Богино хүзүүтэй, үл ялиг гадагш эргэсэн уруултай. Мөр хэсгээр нь хоёр эгнээгээр товойлгон хөвөөлсөн ба савыг бүхэлд нь самнаа хээгээр чимэглэжээ.
Ёроол орчимд нь 1.5 см голчтой нүх бий. Нийт өндөр 60.5 см. Бүсэлхий хэсгээрээ 140 см голчтой. Амсар 22.5 см голчтой. Уруулын зузаан нь 1.9 см. Товгор чимэглэлийн өргөн нь 5 см. Суурийн голч нь 22 см. Хүзүүний доод хэсгээр дан зураасан хээтэй. Бор хүрэн өнгөтэй. Бүдүүн ширхгийн шавраар хийсэн. Шатаалт сайтай. Эргэх хүрдний ором 2.5х2.5 см бүхий сав юм.
Ямаан-Усны дурсгал нь Хангайн нурууны баруун өмнөд хэсгээс, мөн Завхан аймгаас анх удаа олдоод байгаа хүннү язгууртны булш гэдгээрээ сонирхолтой хэмээн эрдэмтэн судлаачид онцлон үзжээ.
