Италийн нэрт загвар зохион бүтээгч Валентино Гаравани, олонд Валентино хэмээн алдаршсан эрхэм 93 насандаа өөд болсон байна.
ХХ зууны загварын ертөнцийн аваргуудын нэг гэгддэг түүний бүтээлүүдийг Элизабет Тейлор, Нэнси Рейган, Шарон Стоун, Жулиа Робертс, Гвинет Пэлтроу зэрэг алдартнууд өмсөж байсан юм.
Тэрбээр 1960 онд Valentino загварын ордныг хамтран үүсгэн байгуулж, Жоржио Армани, Карл Лагерфельд нарын хамтаар мэргэжлийнхээ оргилд заларч байв.
Валентино Гаравани болон Жанкарло Жамметтигийн сан Инстаграмд нийтэлсэн мэдэгдэлдээ “Тэрбээр Ром дахь гэртээ, гэр бүлийнхнийхээ хайранд умбан, тайван нойрссон” гэжээ. Түүний шарилыг нэгдүгээр сарын 21–22-нд Ром хотын Пьяцца Миньянеллид олон нийтэд хүндэтгэл үзүүлэх байдлаар “байршуулна” гэж тус сан мэдээлсэн байна. Харин оршуулгын ёслол нь дараагийн өдөр “Тэнгэрийн элч нар ба Мартируудын ариун Марийн сүм”-д болох аж.
1932 оны тавдугаар сард Ломбарди мужид төрсөн Валентино баян тансаг байдал, сүр жавхланг илтгэсэн цуглуулгуудаараа алдартай. Тэрээр ердөө 17 настайдаа Парис хотод нүүн ирж, “Chambre Syndicale de la Couture Parisienne”-д суралцан, улмаар Жак Фат, Баленсиага, Жан Дессэс, Ги Ларош зэрэг дизайнеруудтай хамтран ажиллажээ.
Испани руу хийсэн аяллаасаа санаа авсан “Улаан Валентино” хэмээх өөрийн гэсэн өнгийг нэвтрүүлсэн нь брэндийг дэлхийд алдаршуулахад чухал үүрэг гүйцэтгэсэн бөгөөд домогт fiesta даашинзаар олны анхаарлыг татсан юм. Энэ өнгө нь загварын ордонд маш чухал утга учиртай болсон тул Валентино 2008 онд сүүлчийн цуглуулгаа толилуулахдаа финалын хэсэгт бүх модельд улаан даашинз өмсгөж байлаа.
Валентино 2013 оны зургаадугаар сард Шведийн гүнж Мадлены Америкийн санхүүч Кристофер О’Нийлтэй гэрлэхэд нь хуримын даашинзыг нь урлаж өгч байсан түүхтэй.
2023 оны арванхоёрдугаар сард Лондон хотын Royal Albert Hall-д болсон Британийн Загварын Шагнал гардуулах ёслолоос тэрээр “Онцгой амжилт” шагналыг хүртсэн юм.
“British Vogue” сэтгүүлийн ерөнхий редактор асан Александра Шулман “Энэ бол маш гунигтай мэдээ. Учир нь тэр орчин үеийн агуу дизайнеруудын сүүлчийнх нь байсан. Түүний гол хувь нэмэр гэвэл хүмүүсийн төсөөлдөг жинхэнэ загвар зохион бүтээгчийн дүр төрхийг илэрхийлж чадсан явдал юм” гэж хэлсэн байна.
“Мөн тэр алдартай үйлчлүүлэгчдээ олон жилийн турш хадгалж чадсан. Тэрээр Жаклин Кеннеди Валентино өмсөж гашуудлын үедээ гарч ирж байсан үеэс жинхэнэ карьераа эхлүүлсэн. Улаан хивсний ёслолууд чухал болохын хэрээр түүний карьер сүүл үедээ улам тэлсэн. Учир нь түүний хувцас яг л тийм тайзанд зориулагдсан байсан. Түүний урласан даашинзууд оффист явахдаа зүгээр л өмсчихдөг хувцас биш харин үнэхээр тансаг, гайхамшигт даашинзууд байлаа” гэж Шулман нэмж хэлсэн байна.
