Америкийн нэрт дуучин Тейлор Свифтийн сүүлд гаргасан уран бүтээл болох “The Fate of Ophelia” дуу нь “Billboard Hot chart”-ийн шилдэг 100 дууны жагсаалтад хэдэн долоо хоногийн турш нэгдүгээр байрт бичигдсэн амжилтаараа бусад уран бүтээлчийн рекордыг эвджээ.
Энэхүү дууны гол санаа нь хайр байгаагүй бол хүн сэтгэл зүйн хямрал, ганцаардал, гутралд живж болзошгүй байсан ч жинхэнэ хайр түүнийг аварч чадна гэсэн утгыг илэрхийлдэг. Фэнүүд нь дууны үгийг романтик хэрнээ зүрх зүсэм, эмзэг боловч хүчирхэг гэж тодорхойлж, Тикток, Инстаграм, Твиттерт дууны хэсгүүд алдартай болж байна. Сонгодог уран зохиолын хамгийн эмгэнэлт дүрүүдийн нэг болох У.Шекспирийн “Ophelia”-г орчин үеийн поп ертөнцөд авчирч, энэ удаад “Ophelia”-г гунигт төгсгөлтэй биш харин хайраар аврагдсан хүчирхэг эмэгтэйгээр дүрсэлсэн. Ингэснээрээ “The Fate of Ophelia” нь зөвхөн хит дуу биш, харин 2025 оны аравдугаар сараас хойш хамгийн их яригдсан уран бүтээл болсон юм.
