Монголын язгуур өв соёлоо дэлхийд таниулах, соёлын брэнд бүтээгдэхүүн болгож хөгжүүлэх ажлыг Монгол угсаатны хөгжмийн товчоо эхлүүлжээ.
1400 жилийн өмнөх үед хамаарах, Монгол баатруудын тоглож байсан “Алтай ятга” хөгжмийг эх олдворт нь судалгаа хийж, дахин сэргээн бүтээсэн байна. Алтай ятгыг сэргээснээр бид нэгэн шинэ төрлийн хөгжимтэй болж байгаа юм. Мөн энэ нь дэлхийн хөгжмийн түүхэнд нэн ховор хөгжмийн зэмсэг гэдгээрээ онцлог.
Алтай ятгыг 1400 жилийн өмнөх дайчин баатрын хадны булшнаас олжээ. Уг зэмсгийн цар нь 2мм нимгэн, тээг нь салаагүй байдалтай олдсон бөгөөд тухайн үед Монголчууд хөгжим урлах өндөр технологитой байсныг илтгэнэ.
Энэ ажлын эхлэл болгож, Алтай ятгыг монголчуудад танилцуулж эгшиг аялгууг нь сонсгох, дэлхий дахинд зарлах АЛТАЙ ЯТГЫГ ДУУРЬСГАХ ИХ ЁСЛОЛ-ыг “Монгол бахархалын төлөө нэгдэцгээе” уриан дор энэ сарын 16-нд АСА циркт зохион байгуулах юм.
Ёслолын ажиллагааны уран сайхны удирдаачаар Д.Ганпүрэв, зөвлөхөөр Төрийн хошой шагналт, хөгжмийн зохиолч Н.Жанцанноров, найруулагчаар Натур даанс продакшний найруулагч Д.Энхбаяр, хөгжмийн найруулагчаар Бро’с рекордсын продюсер М.Болд /Томоо/ нар ажиллана. Мөн нэрт ятгачин Ч.Мөнх- Эрдэнэ, Бөртэ хамтлаг, Алтай хамтлаг, АСА Циркийн жүжигчид, БЦЭДБЧ-ын найрал хөгжим, найрал дуучид зэрэг 100 орчим уран бүтээлчтэй баг бүрэлдэхүүн ёслолд оролцох болжээ.
www.URLAG.mn
