Сүхбаатар аймгийн Угсаатны зүйн музей өнгөрөгч онд музейн сан хөмрөгөө 1000 гаруй үзмэрээр нэмэгдүүлж, долоон жилийн дараа улсын тооллогыг амжилттай зохион байгуулсан амжилтаараа аймгийн тэргүүний байгууллагаар шалгарлаа.
Мөн музейгээр дамжуулж соёлын боловсрол олгох үүргийнхээ хүрээнд хүүхэд, гэр бүлд зориулсан таван төрлийн хөтөлбөрийг хэрэгжүүлсэн нь үр дүнтэй ажил болсон байна.
Музейн захирал Д.Ариундэлгэр “Манай байгууллага өмнө нь 12 жил дарааллан аймгийн засаг даргын эрхлэх хүрээний агентлаг, төсөвт байгууллагуудаас хоёрдугаар байрт шалгарч байлаа. Энэ удаад тэргүүний хамт олон болсондоо баяртай байна. Энэ бол соёлын өвийг хадгалах, хамгаалах, түгээн дэлгэрүүлэх үйлсэд хичээн ажилладаг найрсаг, ажилсаг, бүтээлч хамт олондооболон музейн сан хөмрөгийг нэмэгдүүлэхэд үнэтэй хувь нэмэр оруулсан эрхэм хандивлагчид,өв соёлоо дээдлэн хүндэтгэдэг үйлчлүүлэгч гээд бүгдийн хамтын хичээл, зүтгэл байлаа” гэв.
Угсаатны зүйн музей нь үзмэрийн арван танхимтай бөгөөд 3000 гаруй үзмэртэй болжээ. Стандартын баилгатай болох асуудал хамгийн их тулгамдаж байгаа бөгөөд орон нутгаас газрын асуудлыгшийдвэрлэсэн, зураг төсөв нь бэлэн болсон байна. Гагцхүү улсын төсөвт суулгах ажил удаа дараа хойшилсоор өнөөг хүрчээ. Харин ирэх оны төсөвт суулгана гэх таатай мэдээг тус хамт олон хүлээн авчээ.
