Жүжигчин, уран бүтээлч С.Пүрэвмаа үндэсний хувцасны өдөр тутмын загварын “Өмсгал” бие даасан үзэсгэлэнгээ Монголын Уран зургийн галерейд өчигдөр /2026.02.01/ нээлээ.
Тэрбээр 30 гаруй жилийн турш үндэсний хувцасны өдөр тутмын загварыг судалж, монголын өв соёлыг орчин үеийн амьдралтай хослуулан бүтээж байна.
Түүний “Өмсгал” үзэсгэлэн монгол хүний хувцаслах соёл, нүүдэлчдийн философийг өдөр тутмын хэрэглээний өнцгөөс харуулж буйгаараа онцлогтой.
“Өмсгал” хэмээх нэр нь Өмс/Гал буюу өмсгөлөөрөө өөрийгөө хамгаалж, амьдралын эрч хүчийг тээх гэсэн утга санааг илэрхийлнэ. Үзэсгэлэнд дээл, монгол цамц, өмд, цүнх, малгай, бүс зэрэг 20 гаруй өмсгөл дэлгэжээ. Эдгээр нь биед эвтэйхэн, хөнгөн, байгалийн гаралтай материалтай, амьтны гаралтай түүхий эдээр бүтээсэн байна.
Тус үзэсгэлэн энэ сарын 7-ныг хүртэл үргэлжлэх аж.
Жүжигчин, уран бүтээлч С.Пүрэвмаа монголын тайз, дэлгэцийн урлагт өөрийн тод мөрийг үлдээсэн уран бүтээлч юм. Түүнийг үзэгчид “Би чамд хайртай” уран сайхны кинонд тоглосноор нь сайн мэднэ. Тэрбээр тайз, дэлгэцийн 20 гаруй уран бүтээлд дүрээ мөнхөлснөөс гадна үндэсний хувцасны өдөр тутмын загвар урлан бүтээгч юм.
