Нобелийн утга зохиолын шагналт зохиолч Хан Ганы “Хөвгүүн ирлээ” номыг өмнөд солонгосчууд өнгөрсөн онд хамгийн олон удаа нийтийн номын сангаас зээлж уншжээ. Тодруулбал, Өмнөд Солонгос даяар байрлах 1583 нийтийн номын сангаас тус номыг 60504 удаа уншигчид зээлж авсан байна. Сонирхолтой нь, тус жагсаалтын хоёр, гуравдугаар байрт мөн л Хан Ганы “Цагаан хоолтон”, “We Do Not Part” номууд оржээ. Нийт 1000 номын жагсаалт гарснаас 17 нь Хан Ганы бүтээл байсан аж.
Зөвхөн Хан Ганы зохиолууд гэлтгүй солонгос уран зохиолуудыг уншигчид хамгийн ихээр зээлж уншжээ. Тодруулбал, нийт зээлсэн номын 25 хувь нь солонгос зохиол байсан.
“Хөвгүүн ирлээ” номд 1980 оны тавдугаар сард болсон Кванжүгийн бослогоор амиа алдсан залуу хөвгүүний тухай гардаг. Өмнөд солонгосчуудын хувьд зүрхэнд нь гүн бат шигдэн, траума болж үлдсэн Кванжүгийн бослого гарах үед зохиолч Хан Ган 10 настай жаал охин байж. Кванжүгийн бослого гэхээсээ илүү түүхэнд энэ үйл явдлыг Кванжүгийн хядлага, аллага гэж нэрийддэг.
