Булган аймгийн Орхон сумын төвөөс 5 км зайд хүрэл зэвсгийн үед хамаарах олон тооны хадны зураг хадгалагдан үлджээ.
Энд өөд өөдөөсөө хараад зогсож буй согоо, янгир хоёр, сүүлээ өргөж хоншоороо бага зэрэг дээш өргөсөн нохой, цувраа хоёр аргаль, давхиж яваа морь, гараа алдалсан хүн, таван салаа эвэртэй буга, хоёр гараа алдлан зогссон таван хүн, мөн буга, янгир, үхэр, анжис хөллөсөн үхэр зэрэг амьтдыг ганц нэгээр нь болон хэд хэдээр нь хамтатган дүрсэлжээ.
Ан амьтад болон хүнийг бодит байдлын дагуу дүрсэлсэнтэй зэрэгцээд, хэлбэрдмэл, гаж загвар оруулсан арга барил ч ажиглагдана.
Мөн энд олон салаа эвэртэй, урт босоо чихтэй, нарийн хоншоортой, том, махир эвэртэй янгирууд, зүүн тийш цуварсан морьтон, нисэж яваа шувуу, салаа замаар явж буй адуу болон тэмээ, могой зэргийг дүрсэлжээ. Зарим хадан дахь зураг чухам ямар амьтдынх болох нь мэдэгдэхгүй болтлоо баларч элэгдэж эмтэрчээ.
Ан амьтдыг дүрслэхдээ хонхойлгон сийлэх аргыг хэрэглэсэн нь ажиглагдана. Ялангуяа бугыг сийлсэн арга барил нь ихээхэн өвөрмөц юм. Олон салаа эвэртэй, эргэж харж зогсож буй бугыг дүрслэхдээ аман хүзүүнээс нь далыг хүртэл үргэлжлэх цулгуй зай, сүвээ, хавиргыг нь дагуулсан нэг эгнээ дөрвөн хэсэг зай, гуя, гэдэс тус бүрд нэг хэсэг зай үлдээж сийлсэн нь нэг талаас уг ерөнхий дүрсийг товойлгон сүрлэг болгож, нөгөө талаас эргэн харж буй байдлаар дүрсэлснээр товгор байдлыг тодотгон илэрхийлжээ.
