Ховд аймгийн нутаг дэвсгэрт хүн чулуун хөшөө олон бий. Үүний нэг бол шуртын хүн чулуун хөшөө юм. Тус хөшөө нь Ховд аймгийн Зэрэг сумын Хөндлөн багийн Шурт хэмээх газарт байдаг.
Хүн чулуун хөшөөний толгой хэсэг нь хугарч унасан. Толгой нь нүүр болон дагз хэсгээр дундуураа хоёр хуваагдан тоногджээ.
Хүн чулууны хоёр мөр гарыг бүрэн мэдэгдэхүйц урласан ба баруун гарын цээжний өрц хэсэгт зууван дугуй хэлбэртэй дэрэвгэр амсартай ваар (сав) бариулан, зүүн гарыг зүүн ташаа орчим байрлуулан урласан байна.
Ямар нэгэн сэлэм хутга атгуулаагүй, зүүн ташаандаа сэлэм зүүсэн. Хөшөөний нүүрэн хэсэгт хүний нүд, ам, хамар мэдэгдэхүйц урласан байна. Чихэнд ямар нэгэн ээмэггүй.
Судлаачдын тодорхойлсноор баатар эрийг дүрсэлсэн тус хөшөө нь VI-VIII зууны үед холбогдоно.
1950-1960 оны үед хөшөө унаж, толгой хэсэг хугарч шороонд булагдсан байсныг буцаан босгожээ. Дээрх хөшөөний талаарх мэдээллийг Түүхийн ухааны докторант Х.Бямбасүрэнгийн “Ховд аймгийн нутаг дэвсгэр дэх хүн чулуун хөшөөд” гэх номд бичжээ.
Шурт хэмээх газар нь Зэрэг сумаас баруун зүгт 50 гаруй км, харин Улаанбаатар хотоос 1300 орчим км-ийн зайд оршдог.
