Архангай аймгийн угсаатны зүйн музейд Далай Чойнхор вангийн Чавганц дархны нарийн ур хийцтэй хос домбо хадгалагдаж байна.
Энэ домбыг 1957 онд иргэн Гэндэнбалжираас музейн цуглуулгад тухайн үеийн музейн эрхлэгч Б.Очирхуяг авч байжээ. Домбыг зэсийг хэлбэж, бөөрөнхийлөн гагнаж хийсэн бөгөөд бүсийг нь луун хээг цувцаадах аргаар хөөж, цохиж, мөнгөөр өнгөлсөн байна.
Домбыг бүтнээр нь лууны хэлбэртэйгээр урлаж, бариулыг мөнгөөр өнгөлсөн бөгөөд таван бүслүүртэй. Луун бариул, бүслүүр, харааны эмжээр дээр лууг товойлгон цохиж урлажээ.
XIX-XX зууны үед холбогдох хос домбо нь 2кг 35 гр жинтэй бөгөөд угсаатны танхимын үнэт үзмэр юм.
