Завхан аймагт орчин цагийн тайзны урлагийн үүсэл хөгжил XX зууны эхэн үеэс тавигдсан бөгөөд 1927 онд Хантайшир уулын аймгийн төв Улиастайд жүжгийн хүрээлэн байгуулжээ.
Жүжгийн хүрээлэн байгуулсан нь аймгийн соёл, урлагийн хөгжлийн эх суурь болсон түүхэн үйл явдал юм. Иргэдэд жүжиг үзүүлэх, мөн жүжгийн дугуйлангаар дамжуулан цөөн тооны уран бүтээлчдийг сургаж бэлтгэх үйл ажиллагаа эхэлсэн байна.
Энэхүү урлагийн байгууллага 1942 оноос “Шийний газар” нэртэйгээр үйл ажиллагаагаа тогтмол явуулж эхэлжээ. Архивын ерөнхий газрын кино, гэрэл зураг, дуу дүрсний архивт хадгалагдаж буй 1948 оны баримтат бичлэгт Улиастайд задгай тайзан дээр концерт зохион байгуулж байсан дүрс үлдсэн нь тухайн үеийн урлагийн амьдралыг тодорхой харуулдаг.
1949 оноос тухайн үеийн үзэл суртлын нөлөөгөөр “Шийний газар”-ыг “Ажилчны клуб” хэмээн нэрлэж, үйл ажиллагаагаа улам тэлжээ. Клуб нь дуу, хөгжим, бүжгийн тоглолт зохион байгуулахаас гадна тухайн цагт түгээмэл байсан “Задгай цагаан”, “Хүмүүн төрөлхтөн” зэрэг цөөн хэдэн аялгуунд тулгуурлан олон нийтийн бүжиг идэвхтэй явуулж байв.
Ийнхүү тухайн үед концерт, бүжгийг нэгдмэл байдлаар зохион байгуулдаг уламжлал тогтсон бөгөөд эхлээд урлагийн тоглолт үзүүлж, улмаар олон нийтийн бүжгээр үргэлжлүүлэх нь соёлын үйл ажиллагааг тогтмолжуулсан талаар “Нэгэн зууны он дарааллын шастир” номд тодорхой өгүүлсэн байдаг.
