Монгол Улсаас АНУ-д суугаа ЭСЯ, Монгол Соёлын төв хамтран Олон улсын Монгол судлалын эрдэм шинжилгээний XVIII бага хурлыг Смитсониан хүрээлэн болон Конгрессын номын санд энэ сарын 6-7-нд зохион байгуулав.
Жил бүр зохион байгуулдаг уг хуралд Монтанагийн их сургууль, Колумбийн их сургууль, Пенсильванийн их сургууль, Пенсильванийн Улсын их сургууль, Хойд Каролинагийн их сургууль, Виллиам Мари коллеж, Зүүн Теннесси мужийн их сургууль, Йелийн их сургууль, Америк дахь Монгол судлалын төв болон МУБИС, СУИС, “Чингис хаан” үндэсний музейн төлөөлөл бүхий нийт 30 гаруй эрдэмтэн, судлаач илтгэл хэлэлцүүлэв.
Элчин сайд Ө.Батбаяр хурлыг нээж хэлсэн үгэндээ, Монгол судлал бол Монгол орон, монголчуудыг гадаад ертөнцөд илүү бодитой, шинжлэх ухааны үндэслэлтэй сурталчлах гүүр юм. Монголын баялаг түүх, өв соёл, зан заншлыг АНУ-д сурталчлан таниулахад хурал зохион байгуулагчдаас гадна, их, дээд сургуулиудад ажиллаж буй монголч эрдэмтэд болон монгол судлалыг бие даан судалж буй судлаачид үнэтэй хувь нэмэр оруулж ирсэнд талархал илэрхийлж, монгол судлалын цаашдын хөгжилд АНУ-ын монголч эрдэмтдийн үүрэг оролцоо чухал болохыг онцлов.
“Монголын түүх”, “Хэл шинжлэл”, “Соёл урлаг”, ”Археологи”, “Нийгэм” зэрэг салбар хуралдаанаар өрнөсөн тус хурлын түлхүүр илтгэлийг Пенсильванийн их сургуулийн нэрт монголч эрдэмтэн, профессор Кристофер Этвүүд “Богд баатар биеэр дайлсан тэмдэглэл” сэдвээр хүргэж, хэлэлцүүлэг өрнүүлэв.
Оролцогчид Конгрессын Номын сангийн Азийн хэсэгт байрладаг монголын холбогдолтой ховор ном, бүтээлтэй танилцав. Энэхүү хуралд 100 орчим хүн оролцсоныг Монгол Улсаас АНУ-д суугаа ЭСЯ мэдээлэв.
