“Дон Жуан” дуурийн анхны тоглолт 1787-10-29 нд Прага хотноо болж байсан түүхтэй. Харин манай тайзнаа 2004 оны аравдугаар сарын 23-нд анх тоглож байсан юм. Энэ удаагийн “Дон Жуан” дуурийн гол дүрүүдэд буюу Дон Жуанд Ч.Энхтайван, Лепореллод Ж.Бямбажав, Донна Аннад Б.Энхнаран, Дон Оттовиад Б.Гомбо-Очир, Донна Эльвирад Ш.Наранчимэг, Церлинад Ө.Уянга, Мазеттод Э.Бумхүү, комендаторт С.Бат-Эрдэнэ нар удирдаач Н.Туулайхүүгийн удирдлан дор эгшиглүүлэх юм.
Венийн хөгжмийн их сургуулийн профессор Ребекка Бланкеншип тус дуурийн найруулагч урилгаар ажиллаж байна. Ребекка Бланкеншип нь Австри улсын нэрт дуурийн дуучин, жүжигчин байсан бөгөөд одоогоор Венийн хөгжмийн их сургуулийн профессор, найруулагч юм.
B.А.Моцартын “Дон Жуан” дуурь нь дуучдаас дуулахаас гадна жүжигчний өндөр ур чадвар, хөгжимчдөөс илүү нарийн мэдрэмж, техник шаарддаг, томоохон бүтээл билээ. Уг бүтээлээр дуучид, хөгжимчдийн ур мэргэжлийн чадварын түвшин, тухайн улсын сонгодог урлагийн хөгжлийн чиг хандлагыг тодорхойлдог байна. “Дон Жуан” дуурийн эмэгтэй дүрүүд тус бүр өвөрмөц онцлог, зан чанартай гайхалтай бүсгүйчүүд байдаг бөгөөд гол дүр Дон Жуаныг хурцатгаж өгдөг бол түүний шадар туслах Лепорелло бас хоолойтой дуучны хувьд хамгийн том дүрүүдийн нэг нь байдаг аж.
www.URLAG.mn