Монгол Улсын Филармонийн дэргэдэх “Баянмонгол” чуулгын ууган дуучин, СТА Л.Оюунчимэг агсны нэрэмжит “Үртэй хүн жаргалтай” олон улсын рок, поп дуучдын уралдаан энэ оны 06 дугаар сарын 01-ний өдөр буюу Эх, үрсийн баяраар зохиогдохоор болжээ.
Тус уралдааныг Монголын эстрад урлагийн амьд архив хэмээн хэлэгддэг Д.Ухнаа гуай санаачилсан байна. Уралдаанд хот, хөдөөгийн театруудын дуучид, дуулаачийн ангийн оюутнууд, дуулах сонирхолтой хүмүүс оролцож болохоос гадна гадаадын гурван орны дуучид оролцоно гэдгээ мэдэгдээд байгаа аж.
Авьяаслаг дуучин агсан Л.Оюунчимэгийн төрсөн нутаг болох Ховд аймгийн Эрдэнэбүрэн сумын Нутгийн зөвлөл, Оюутны холбоо, түүний үр хүүхдүүд, төрөл төрөгсөд нь мөн энэ ажилд идэвхийлэн оролцож байгаа гэнэ.
Уралдаан 2014 оны 06 сарын 01-ний 18.00 цагт Улсын Филармонийн зааланд болох тул та бүхэн өргөнөөр очиж сонирхохыг урьж байна. –
www.URLAG.mn
