Хүнийг амьдад нь хайрлаж, алдаршуулна гэдэг хамгийн сайхан. Олны хайртай дуучин Н.Төмөрхуяг Монгол Улсын гавьяат хэмээх цолыг хүртсэн нь дээрх үгийн биелэл болсон гэлтэй. Төрийн тэргүүний мэдрэмжтэй зарлиг ард түмний хүсэн хүлээсэн цолыг баталгаажуулсан нь хэдхэн сарын өмнөх явдал.
Дуучин Н.Төмөрхуягийг гавьяат болсон өдөр нь соёлын тэргүүний ажилтан Д.Балдан тоглолтыг нь зохион байгуулах ажилдаа оржээ. Ийнхүү 18 жилийн дараа Н.Төмөрхуяг дуучин ард түмэнтэйгээ уянгалаг дуунуудаараа учран золгох боломж бүрдсэн юм.
Тоглолтыг санаачлан зохион байгуулагчид болон Н.Төмөрхуяг гавьяатын фэнүүд “Хайртай дуучнаа байртай болгоё” хэмээн уриалж, хандивын аян өрнүүлсэн. Тэд зорьсондоо хүрч чаджээ. “Хамаг Монгол” группын ерөнхийлөгч Нямбаяр УГЖ Н.Төмөрхуягт нэг өрөө байр бэлэглэсэн нь “Хорвоод ганцхан ээждээ” тоглолтын хамгийн том сюрприз байсан билээ. Ийнхүү Хэнтий нутгийнхан ард түмний хайртай дуучнаа алдаршуулан, урамшуулж, цаашид олон сайхан уран бүтээл хийх эрч хүч хайрлажээ.
Н.Төмөрхуяг гавьяаТ наадмаар ашиглалтад орох шинэ байраа хүлээн догдолж суугаа бөгөөд тоглолтыг нь санаачлан зохион байгуулж, хамтран дуулсан дуучин Д.Балдан болон Хэнтий аймгийн удирдлагууд, Улаанбаатар хот дахь нутгийн зөвлөлийнхөн, дэмжиж тусалсан бүх хүмүүст баярлаж талархсанаа илэрхийлсэн байна.
