Холливудад өнгөрсөн жилийн сүүлээс хойш “Warner Bros”-гийн каталогийг худалдан авах “дайн” өрнөсөн. Тэгвэл тэрхүү өрсөлдөөнд “Netflix” бууж өгч “Paramount Skydance” каталогийг худалдан авах нь тодорхой боллоо. Анх “Netflix” компани “Warner Bros”-ийн студи, стриминг салбарыг 72 тэрбум ам.доллароор худалдан авах тохиролцоонд хүрсэн юм. Үүний дараа “Paramount Skydance” 108 тэрбум ам.долларын санал тавьсан билээ.
“Warner Bros” бодлоо өөрчлөхгүй байсан тул “Paramount Skydance” хэд хэдэн удаа саналаа сайжруулсан юм. Хамгийн сүүлийн саналаар “Paramount Skydance” нэгж хувьцаа бүрд 30 ам.доллар амласнаа 31 болгон нэмэгдүүлсэн. Мөн “Netflix”-тэй хийсэн гэрээгээ цуцлахад төлөх ёстой мөнгийг нь өгч, “Paramount Skydance” зохицуулагчдаас “Warner Bros”-ийг нэгтгэх зөвшөөрөл авч чадахгүй бол 5.8 тэрбум ам.доллар төлнө гэж санал болгосноо 7 тэрбум болгон өсгөсөн юм. Үүнээс гадна есдүгээр сарын 30-наас эхлэн “Warner Bros”-ийн хувьцаа эзэмшигчдэд нэгж хувьцаанд 25 цент бодож улирал бүр төлөх санал тавьжээ. Энэхүү улирал бүрийн 25 центийн төлбөрийг “Warner Bros” “Netflix”-тэй хийсэн гэрээгээ цуцлах хүртэл өгөх юм.
Нэгж хувьцаанд тооцож төлөх мөнгөө 31 ам.доллар болгон нэмэгдүүлсний дараа “Netflix” компани бууж өгч буйгаа зарлажээ. Netflix “Paramount Skydance-ийн хамгийн сүүлд тавьсан саналтай өрсөлдөх үнэ нь санхүүгийн хувьд хүсэмжит биш болсон тул бид татгалзаж байна” гэсэн юм. Харин “Warner Bros”-ийн гүйцэтгэх захирал Дэвид Заслав “Манай ТУЗ Paramount-тай нэгдэх гэрээг батлах санал хураалт явуулсны дараа манай хувьцаа эзэмшигчдэд асар их ашиг авчирна” хэмээжээ.
