Австралийн Тасмани арлын баруун хэсэгт “Earth’s Black Box” гэдэг нэртэй өвөрмөц төсөл хэрэгжиж байгаа бөгөөд үүнийг “хүн төрөлхтний хар хайрцаг” хэмээн нэрлэж байна. Энэхүү төслийг дэлхий дахинд соёл иргэншлийн сүйрэл нүүрлэсэн тохиолдолд өнөөгийн эрин үеийн дижитал баримтыг хадгалж үлдээх зорилгоор хэрэгжүүлж байгаа ажээ.
Геологийн хувьд тогтвортой, алслагдсан газарт ойролцоогоор 10 метр урттай цул ган байгууламж суурилуулж байгаа бөгөөд 7.5 см зузаан ханатай уг бүтцийг асар том боржин чулуун суурин дээр байрлуулж байгаа аж. Уг байгууламжийг эрс тэс нөхцөлийг тэсвэрлэж, олон арван жилийн турш гадны оролцоогүй ажиллана гэж зохион бүтээгчид нь найдаж байна.
Энэхүү төслийг Тасманийн их сургууль, Clemenger BBDO сурталчилгааны агентлаг болон The Glue Society уран бүтээлийн нэгдэл санаачилсан байна. Уг байгууламж нь нарны эрчим хүчээр ажиллах аж.
“Хүн төрөлхтний хар хайрцаг” дотор нүүрстөрөгчийн давхар ислийн агууламж, агаар ба далайн температур, далайн усны хүчилжилт, эрчим хүчний хэрэглээ зэрэг дэлхий болон нийгмийн байдлын үзүүлэлтүүдийг тасралтгүй бүртгэх мэдээлэл хадгалах системүүдийг байрлуулах гэнэ. Мөн улс төрийн шийдвэрүүд, мэдээ мэдээлэл, нийгмийн сүлжээний нийтлэлүүдийг хадгалж архивлах юм.
Хэрэв хүн төрөлхтөн асар том гамшигтай тулгарвал энэхүү “хар хайрцаг” нь болсон үйл явдлыг сэргээж, хямралын шалтгааныг ойлгоход дараагийн үед тусална гэж зохион бүтээгчид нь үзэж байна. Системийг бүрэн ажиллагаанд оруулах хугацааг энэ оноос хэтрүүлэхгүй байхаар төлөвлөжээ.
