Ням гарагт болсон Академийн 98 дахь удаагийн шагнал гардуулах ёслолоос шилдэг туслах эрэгтэй дүрийн шагналыг “One Battle After Another” кинонд бүтээсэн дүрээрээ Шон Пэнн хүртсэн билээ. Гэвч тэрбээр уг ёслолын арга хэмжээнд оролцоогүй бөгөөд шагнал авахаар тайзнаа гараагүй юм.
Учир нь Шон Пэнн даваа гарагт Киев хотноо Украины ерөнхийлөгч Володимир Зеленскийтэй уулзсан байна.
Шон Пэнн бол Оросын эзлэн түрэмгийллийн эсрэг дайтаж буй Украин улсын идэвхтэй дэмжигч бөгөөд өнгөрсөн хугацаанд хэд хэдэн удаа тус улсад айлчилж байв. Ням гарагт тэрбээр гурав дахь “Оскар”-ын шагналаа хүртсэн юм.
“Тэр Украинд байгаа. Гэхдээ энэ бол түүний хувийн айлчлал. Тэр өөрийгөө Украинд байх хэрэгтэй гэж үзсэн. Тэр зүгээр л Украиныг дэмжихийг хүсэж байна” гэж Киевийн албан эх сурвалжууд мэдээлжээ.
Пэнн өмнө нь 2023 онд Зеленскийн тухай баримтат киног хамтран найруулж байсан юм. Харин Ерөнхийлөгч Зеленский сошиал хуудсандаа түүнтэй уулзаж байгааг харуулсан зургаа нийтлээд “Шон. Таны ачаар бид Украины жинхэнэ найз нөхөр ямар байдгийг мэддэг болсон” гэж бичсэн байна.
