Бүүвэйн тэнгэр ээжийгээ би чинь санаж л цөхөрлөө
Бүрэнхий шөнийн зүүдээ би чинь манаж л ядлаа
Хүний нутгийн холыг яалтай
Хөхрөх харгуйн уртыг
Хүрэн зүрхний эмзгийг яалтай
Хайрын тэнгис ээжийгээ би чинь санаж л бэтгэрлээ
Харанхуй шөнийн зүүдээ би чинь манаж л ядарлаа
Гүний хошууны алсыг яалтай
Гүйгээд гүйцэхгүй замыг
Гүн гүнзгий гунигийг яалтай
Дахилт: Уртын уртын харгуйг нь туулан явж зүүдэллээ
Ухаантай сайхан ээжтэйгээ уулзан золгож зүүдэллээ
Даваа давааны холыг нь даван явж зүүдэллээ
Даамай сайхан ээждээ би үнсүүлж зүүдэллээ
Ачтай сайхан ээжээсээ би чинь алсхан л явна даа
Алаг хоёр нүдэндээ би чинь нулимстай сэрлээ дээ
Салгуун алсын нутгийг яалтай
Санаснаар болдоггүй хорвоогийн
Сар жилүүдийн уртыг яалтай
Дахилт: Уртын уртын харгуйг нь туулан явж зүүдэллээ
Ухаантай сайхан ээжтэйгээ уулзан золгож зүүдэллээ
Даваа давааны холыг нь даван явж зүүдэллээ
Даамай сайхан ээждээ би үнсүүлж зүүдэллээ /х2/
