Тууль бол ардын аман зохиолын шүлэглэн хэлэх томоохон төрөл бөгөөд түүнийг аялгуулан хайлах нь монголчуудын өвөрмөц соёлын биет бус өвийн нэг билээ. Энэ уламжлалыг хадгалж, залуу үед өвлүүлэхэд чиглэсэн олон талт үйл ажиллагааг Ховд аймагт өрнүүлж байна. Тодруулбал, Жангар туулийг заан сургах шавь сургалтыг анх удаа зохион байгуулж байна. Сургалтад хамрагдах хүсэлт гаргасан 50 гаруй хүнээс 10 оролцогчийг сонгон авчээ.
Тэд 10 хоногийн хугацаанд тууль хайлах арга барил, товшуур хөгжимдөх ур чадварыг эзэмших юм. Ингэснээр Жангар туулийг язгуур хэв шинжээр нь өвлөн хамгаалж, соёлын биет бус өвийг хөгжүүлэхэд бодит хувь нэмэр оруулна. Сургалтыг Соёлын гавьяат зүтгэлтэн, төрийн батламжит туульч А.Балдандорж тэргүүтэй туульчид удирдан чиглүүлж байгаа юм. Ингэхдээ нэрт туульч М.Пүрэвжал агсны аялгуу, хэв маягийг сэргээн амилуулахыг зорьж байгаа нь чухал ач холбогдолтой.
1924 оноос Оросын Борис Владимирцов тэргүүтэй эрдэмтэд Монголын ардын аман зохиолын нэгэн төрөл болох туулиудыг судалж, бичиж тэмдэглэх судалгааны ажлыг эхлүүлсэн бөгөөд Монголчуудын олон овог ястны дунд Жангарын тууль түгээмэл тархахдаа аль нэг бүлэг нь олон хувилбараар тархсаныг олж илрүүлжээ. Шинжлэх Ухааны Академи Монгол нутгаас олдсон Жангар туулийн олон бүлгийн аман хувилбарыг цуглуулж хоёр удаа эмхтгэн гаргасан бөгөөд 1963 онд эрдэмтэн багш Т.Дүгэрсүрэн Жангар туулийн 13 бүлгийг Халимаг хэлнээс орчуулан хүртээл болгосныг 2000 онд түүний үр хүүхдүүд нь 26 бүлэг болгон хэвлүүлсэн байдаг. Жангарын бүлгүүдийг бүрэн олж цуглуулах, сонгомол эх бүтээх эхийг тавьсан хүн бол эрдэмтэн зохиолч Цэндийн Дамдинсүрэн юм. Монгол судлалын нэрт эрдэмтэн Бямбын Ринчен өөрийн шавь Т.Галсанд Жангар туулийг эмхтгэн Монгол Жангарын сонгомол эхийг бэлтгэх даалгавар өгснийг удам дамжсан туульч өөлд Тангадын хүү биелүүлж, 2006 онд Монгол Жангар хөлгөн их судрын хоёр ботийг Монгол түмэндээ өргөн барьсан. Жангар бол улс төр, шашин, Монголын ахуй амьдрал, түүх зэрэг бүхий л шинжлэх ухааныг өөртөө багтаасан яруу найраг хэлбэрээр бичигдсэн өв соёлын агуу бүтээл мөн.
