Хиймэл оюун ухааны чатбот “ChatGPT” Японы хамгийн нэр хүндтэй их сургуулиуд болох Токиогийн их сургууль болон Киотогийн их сургуулийн энэ жилийн элсэлтийн шалгалтад хамгийн өндөр оноо авсан гэж тус улсын “AI” стартап “LifePrompt Inc.” даваа гараг /2026.04.27/-т мэдээллээ. Оноо нь шилдэг сурагчдын шалгалтын онооноос ч өндөр байсан гэж “Kyodo” агентлаг мөн мэдээлжээ.
“LifePrompt Inc.”-ийн мэдээлснээр, “ChatGPT” нь Токиогийн их сургуулийн хамгийн өрсөлдөөнтэй, эмнэлгийн чиглэлээр суралцах сурагчид өгдөг байгалийн шинжлэх ухааны III шалгалтад хамгийн өндөр оноо авсан хүний онооноос 50 оноогоор илүү дүн үзүүлсэн.
Харин математикийн шалгалтад бүрэн оноо авчээ. Тус компани “ChatGPT 5.2 Thinking” загварыг ашиглан хоёр их сургуулийн бакалаврын элсэлтийн шалгалтыг өгүүлсэн байна. Шалгалтын асуултуудыг зураг хэлбэрт хөрвүүлж “AI”-д өгсөн бөгөөд эсээ хэлбэрийн хариултуудыг нь Японы томоохон бэлтгэлийн сургууль болох “Kawai Juku”-ийн багш нар дүгнэжээ.
“ChatGPT” мөн энэ жилийн улсын нэгдсэн элсэлтийн шалгалтуудад оролцсон бөгөөд “LifePrompt” нийт оноог нь нэгтгэн тооцсон байна.
Токиогийн их сургуулийн хүмүүнлэг, нийгмийн шинжлэх ухааны шалгалтад “ChatGPT” 550 онооноос 452 оноо, байгалийн шинжлэх ухааны шалгалтад 550 онооноос 503 оноо авсан байна. Энэ хоёр үзүүлэлт нь тус сургуулиас зарласан амжилттай элсэгчдийн хамгийн өндөр оноо болох 434 (Хүмүүнлэг, нийгмийн шинжлэх ухаан III) болон 453 (Байгалийн шинжлэх ухаан III)-аас давсан байна.
Нөгөө талаар “AI” нь англи хэлний шалгалтад 90 хувь, харин дэлхийн түүх зэрэг эсээ хэлбэрийн даалгаварт ердөө 25 хувь авсан байна.
Киотогийн их сургуулийн шалгалтын хувьд, хуулийн факультетад 734-ийн босго онооноос давж 771 оноо, анагаах ухааны факультетад хамгийн өндөр гэх 1,098 онооноос давж 1,176 оноо авсан байна. “LifePrompt” компани 2024 онд “ChatGPT 4” загварыг ашиглан Токиогийн их сургуулийн элсэлтийн шалгалтыг өгүүлсэн боловч босго доод оноонд хүрч чадаагүй байжээ. Дараа жил нь шинэ o1 загварыг туршихад анх удаа тэнцэх босгыг давсан байна.
“LifePrompt” компанийн тэргүүн Сатоши Эндо хэлэхдээ “Хиймэл оюуны чадвар сайн судлагдсан. AI маш хурдан хөгжиж байгаа тул компаниуд 10–20 жилийн дараах бизнесийн орчныг харж “AI”-г ашиглаж эхлэх шаардлагатай” гэжээ. Кэйо их сургуулийн профессор, Японы Хиймэл оюуны нийгэмлэгийн тэргүүн Сатоши Күрихара хэлэхдээ, “AI” нь асар их мэдээллийг шингээж чаддагаараа давуу тул хүнтэй шууд өрсөлдүүлэх нь зохисгүй гэж үзжээ. Тэрбээр “Тооцоолуур хүнийхээс хурдан бөгөөд илүү зөв тооцоо хийдэгтэй адил AI өндөр оноо авах нь хэвийн зүйл” гэж хэлсэн байна. “Харин хүмүүс шинэ үнэ цэнийг бүтээх чадвараараа давуу хэвээр байна” гэж мөн онцолсон байна.
