ОХУ-ын Бүгд Найрамдах Буриад Улсын Хоца Намсраевын нэрэмжит Драмын эрдмийн театрын жүжигчид “Халхын гол. Тангараг” жүжгээ Монголын үзэгчдэд өчигдөр толилууллаа.
Тус театрын хамт олон энэ удаад Батлан хамгаалах яамны урилгаар Улаанбаатарт ирж шинэ уран бүтээлээ Ялалтын баярын 81 жилийн ойн босгон дээр Офицеруудын ордонд толилуулж буй юм.
Тэртээ 1939 оны Халх голын дайн буюу Монголын зүүн хил рүү Японы цэргүүд довтлох үеийн үйл явдлыг харуулсан уг жүжигт эх орноо хамгаалах үйл хэрэгт өөрсдийн чадлаар туслах хүсэлтэй цэл залуухан сувилагч бүсгүйчүүд, манайд туслахаар ирсэн Зөвлөлтийн цэргүүдийн талаар өгүүлжээ.
Дайсны суманд өртөн шархадсан Улаан армийн нисгэгч Василий 19 настай сувилагч Мөнхцэцэгт хайртай болно. Нэг нь орос, нөгөө нь монгол хэл мэдэхгүй хэдий ч шууд л ойлголцож, бие биедээ өөрсдийн хэлийг зааж өгнө. Цэргийн орос эмч Татьяна Петровна, Мөнхцэцэгийн аав Энхбаяр, ахлах сувилагч Чимэдцэрэн, сувилагч Балдармаа нар тэдний харилцааг төдийлөн таашаахгүй. Орос эмч Татьяна Петровна залуухан сувилагч охидыг сайн ажиллахыг шаардана.
Цаг хугацаа ч хурдан өнгөрч нэг л мэдэхэд шарх нь эдгэрсэн оросын нисгэгч Василий Москва руу буцах болно. Тэрээр залуухан сувилагч Мөнхцэцэгийг авч явах гэсэн боловч бүсгүй үлдэнэ…
Уг жүжигт тоглохын тулд Буриадын жүжигчид тусгайлан монгол хэлний хичээл заалгасан тухай Хоца Намсраевын нэрэмжит Драмын эрдмийн театрын дарга Цыпилма Очирова ярьсан юм. Жүжгийн найруулга, тайз засал нь энгийн хэрнээ өвөрмөц байсан нь найруулагчийн уран чадварыг илэрхийлжээ.
Ташрамд дурдахад, “Халхын гол. Тангараг” жүжгээ Хоца Намсраевын нэрэмжит Драмын эрдмийн театрын жүжигчид Москва хотноо тоглосон юм байна. Уг жүжиг нь 2025 онд ОХУ-ын театрын шагнал болох “Алтан маск”-ыг хүртжээ.
