Дэлхийд алдартай дуучин Билли Айлиш оролцсон нэгэн нэвтрүүлгийнхээ үеэр ирээдүйн карьерынхаа талаар анхаарал татсан мэдэгдэл хийжээ. “Грэмми”-ийн шагналт уран бүтээлч тэрбээр удаан хугацаанд бодож явсан өөр нэгэн мөрөөдлөө энэ удаа илүү тодорхой ярьсан бөгөөд түүний хэлснээр, ирээдүйд зөвхөн хөгжмийн карьераар хязгаарлагдахыг хүсэхгүй байгаа аж.
Тэрбээр цаашид театр болон тайзны урлагийн төслүүдэд оролцох сонирхолтой гэдгээ хэлжээ. Мөн тайзны урлагт оролцох нь өөрийнх нь хувьд маш сонирхолтой, догдлом туршлага болно гэж тайлбарлажээ. Түүнчлэн тэрбээр бага наснаасаа эхлэн зөвхөн хөгжим бус, олон төрлийн уран бүтээл, тайзны илэрхийлэлд татагддаг байсан гэдгээ дурдсан байна.
Дуучны энэ мэдэгдэл богино хугацаанд сошиал сүлжээнд яригдаж эхэлжээ. Шүтэн бишрэгчид нь түүнийг ирээдүйд “Broadway” маягийн томоохон тайзны төсөлд оролцох болов уу хэмээн таамаглаж байна.
