BTS хамтлагийн Хойд Америкт хийсэн “Arirang” аялан тоглолтыг нийт 840 мянган хүн үзсэн талаар “BigHit Music” агентлаг мэдээллээ. Долоон гишүүнтэй тус хамтлаг АНУ-ын Тампа, Эл Пасо, Стэнфорд, Лас Вегас хот болон Мексикийн Мехико хотод нийт 15 тоглолт хийсэн. Эдгээр тоглолтын тасалбар нь бүрэн зарагдсан байна. Тасалбарын эрэлт маш өндөр байсан тул BTS хамтлаг Тампа, Стэнфорд, Лас Вегас хотуудад нэмэлт тоглолт зохион байгуулсан бөгөөд эдгээр нь мөн бүрэн дүүрэн үзэгчтэй байв.
Хамтлагийн гишүүд Өмнөд Солонгост цэргийн албаа хаасны дараа бараг дөрвөн жилийн завсарлагаа дуусгаж, өнгөрсөн сард энэхүү дэлхийн аялан тоглолтоо эхлүүлсэн юм. АНУ-ын “Billboard” сэтгүүлийн мэдээлснээр, BTS өнгөрсөн дөрөвдүгээр сард Өмнөд Солонгосын Гоян, Японы Токио болон АНУ-ын Тампа хотуудад хийсэн найман тоглолтоос 76.2 сая ам.долларын орлого олж, 417 мянган тасалбар борлуулсан байна. Ингэснээр тус хамтлагийн аялан тоглолт тухайн сарын хамгийн өндөр орлоготой тоглолтоор шалгарчээ.
