Тоос тортог бужигнасан өрөөнөөс олон жил дарсан дарсны зөөлөн, чихэрлэг үнэр ханхална. Энэ бол Гүржийн хамгийн алдартай бөгөөд маргаантай удирдагч Иосиф Сталины эзэмшиж байсан дарсны зоорь юм. Энэ долоо хоногт Гүржийн засгийн газар нийслэл Тбилисид байрлах уг дарсны зоорийг анх удаа олон нийтэд нээлээ. Тус цуглуулгад Франц болон Гүржийн 40 мянга орчим ховор дарс багтжээ. Засгийн газар эдгээр дарсыг дуудлагаар худалдахаар төлөвлөж байна. Зарим дарс нь 200 гаруй жилийн настай аж. Олсон орлогоороо Гүржид дарсны боловсролын сургууль байгуулах юм байна.
Засгийн газартай хамтран ажиллаж буй дарсны үйлдвэрийн эзэн Иракли Гилауригийн хэлснээр, энэ дуудлага худалдаа Гүржийг дарс цуглуулагчдын дунд илүү алдартай болгоход тусална гэжээ. Гүрж улс нь дарсны өлгий нутаг гэж тодорхойлогддог бөгөөд археологийн баримтуудаар тэнд 8,000 жилийн турш тасралтгүй дарс үйлдвэрлэж ирсэн нь батлагдсан байдаг.
Гүржид төрсөн Сталин 1924-1953 онд ЗХУ-г удирдаж байхдаа дарс уух, цуглуулах дуртай байжээ. Түүний цуглуулгад Оросын хаан Александр III болон Николай II нарын эзэмшиж байсан Францын алдарт Бордогийн дарсууд багтдаг. 1917 оны Оросын хувьсгалын дараа Зөвлөлтийн засгийн газар хааны дарсны цуглуулгыг хураан авч, хожим Сталин өөрийн дуртай Гүрж дарсуудыг нэмсэн байна.
АНУ-ын Техас мужийн Даллас хотоос ирсэн дарс цуглуулагч Виктор Чен уг зоорийг үзээд маш их сэтгэгдэл төрсөн гэж хэлжээ. Тэрбээр “Индиана Жонс нууц агуй нээж байгаа мэт мэдрэмж төрж байна. Дотор нь юу ч байж болно, эсвэл үнэхээр үнэт зүйл ч байж мэднэ” хэмээн ярьсан байна. Мөн “Өнөө үед ийм түүхэн мөч ховор. Энэ бол тэдний нэг байж болох юм” гэж нэмж хэлжээ.
