Өвөрхангай аймгийн Хархорин сумын “Торгоны замын нууц” жуулчны баазад Чингис хаан Үндэсний музей “Түмэн Амгалант Асар” ХХК хамтран “Монголчууд ба Торгоны зам” тусгай үзэсгэлэнг орон нутагт анх удаа дэлгэлээ.
Энэхүү үзэсгэлэнг Их Монгол улс байгуулагдсаны түүхт 820 жилийн ойд зориулан зохион байгуулж буй дотоодын томоохон үзэсгэлэнд бөгөөд, нийт 38 дэсийн 46 үзмэрийг нийтэд ил болгон үзүүлж байна.
Даян дэлхийд Монголын их амар амгалан (Pax Mongolica)-г тогтоож байсан Монголын эрин үе гэгдэх XIII-XIV зууны үед Ази, Европыг холбосон худалдааны гол коридор болох Торгоны зам дагуух соёлын их солилцоо, худалдаа, эдийн засаг, бичиг соёлын өвийг энэхүү үзэсгэлэнгээр дамжуулан мэдэх боломжтой.
Тус үзэсгэлэн есдүгээр сарын 15-ныг хүртэл олны хүртээл болно.
