Монгол Улсын Ерөнхийлөгчийн ивээл дор зохион байгуулж буй “Евразийн Их солилцоо: ирээдүйн боломж, хамтын ажиллагаа” олон улсын музейн анхдугаар чуулганы хүрээнд Г.Занабазарын нэрэмжит Дүрслэх урлагийн музей болон ОХУ-ын Москва хотын Дорно дахины улсын музейтэй хамтран ажиллах санамж бичиг байгууллаа.
Санамж бичигт Г.Занабазарын нэрэмжит Дүрслэх урлагийн музейн захирал, доктор (Ph.D) П.Байгалмаа, Москвагийн Дорно дахины улсын музейн ерөнхий захирал, түүхийн ухааны доктор Александр Всеволодович Седов нар энэ сарын 19-нд гарын үсэг зурав.
Санамж бичигт тусгаснаар талууд музейн үзмэр цуглуулгыг судлах, сурталчлан таниулах, эрдэм шинжилгээ, хамтарсан судалгаа, олон улсын сургалт зохион байгуулах, боловсролын үйл ажиллагаа, танин мэдэхүй, ном, судалгааны материал солилцох, хэвлэн нийтлэх, хамтарсан үзэсгэлэнгийн төсөл зэрэг чиглэлээр хамтран ажиллах юм.
